I le faamanatu ai o le 50 tausaga o le feagaiga a Samoa ma Niu Sila, le Treaty of Friendship, ua faailoa mai ai nisi o fesoasoani fou mo Samoa faatasi ai ma nisi o fesoasoani ua mae‘a sainia o le a faaauau pea.
O le galulue soosoo tau‘au o Malo e lua, talu mai le tausaga e 1962 ina ua tutoatasi Samoa i le vaaiga a Niu Sila, na faaauau mai ai le va galulue faatasi o ia atunuu e lua.
O le faamautu ai la o lea va fefaauoai o malo e lua ua iai sona laasaga fou. O le va lava lea o le alii Palemia o Niu Sila le Afioga Toosavili John Key ma lona afioaga i Samoa nei. Le afioga o Poutasi i Falealili.
O le asiasiga a le Alii Palemia o Niu Sila i le afioaga o Poutasi i Falealili o se tasi o afioaga na matuā iloga le mafatia ina ua maliliu ma manunu‘a ona tagata i le tsunami o le 2009 na muai feiloai ai le alii Palemia ma sui o lea afioaga, ma o le faaiuga o lea feiloaiga na faapea ai loa ona faaee le suafa Toosavili i le alii Palemia.
O lea la na toe asia i le asiasiga o le vaiaso na tea nei e le alii Palemia o lea afioaga ma faamautu ai lona fia fesoasoani i lea afioaga. Faaalia e Tuatagaloa Joe Annandale o se taitai o Poutasi, o le a faaaogā lea fale mo soo se faamoemoe e fia faaaogā ai e pei o fonotaga, mafutaga, faamalositino, o le aoga kuka mo tina, soifua maloloina, polokalame mo tupulaga ma ua faaauupegaina mo le agai i luma.
O le tau aofai o lea faamoemoe, e lata i le $1 miliona tala Samoa ma na faatupe mai lava i fesoasoani mai fafo faatasi ai ma suegatupe a le afioaga sa faia. Na molimauina le tausagi fiafia atu o le afioaga e tusa o le faamoemoe tāua o lo latou nuu, ma na auai uma e amata mai i alii ma faipule o tina ma le aumaga seia oo lava i le fanau aoga.
Faaalia le agaga fiafia o le alii Palemia o Niu Sila e tusa o le faamoemoe o Poutasi faatasi ai ma le Malo o Samoa i itu uma ua mafai ona fefaasoaai ai mai tausaga ua mavae aemaise ai o fuafuaga o le lumanai.
O se fiafia tele na sami ai lenei galuega e pei foi ona iai ma nisi o galuega a se tasi o alo o le afioaga ua iloga lana taleni tusiata i Niu Sila o Fatu Feuu, lea na faalauiloa uma i lea aso fiafia o le afioaga o Poutasi. E toaiva tagata o le afioaga na fano ai i le faalavelave faalenatura na matuā faaleagaina ai afioaga aemaise o soifua o nisi o le atunuu.
O le faaaliga a Toosavili John Key, o le a taumafai e malaga ese mai lava ia e asiasi mai i Poutasi i tausaga o i luma ona o lona manaoga ia tumau le fesootaiga lenei ma le afioaga.
O lana faafetai foi ona o le mafai e Poutasi ona faaauau i soo se laasaga o ona atinae e ui ina matuā faigata le tulaga sa iai ina ua faato‘ā asiasi mai i le taimi o le tsunami.
O Poutasi foi lea ua iloga le malosi o le lagolago i le polokalame o galuega faavaitaimi ia ua malaga atu i Niu Sila mo le tauina o le apu ma isi fua o fualaau‘aina.
O se tasi lenei o afioaga ua faaalia e le ofisa o le Palemia o loo faatautaia galuega faavaitaimi nei, e lelei tele ripoti i lo latou faatautaia o galuega i Niu Sila, ma e lē o ‘asa lava le tausaga o lenei polokalame ma tagata mai i lea afioaga e aofia i faigamalaga i tausaga taitasi.
Na umi se taimi sa iai le aumalaga a Niu Sila lea na agai mai i Poutasi i le faatinoga o le sauniga e sami ai le tatalaga o lenei maota, aemaise o le faaauau ai o fesootaiga a le alii Palemia o Niu Sila ma sui o le afioaga o Poutasi.
O Toosavili John Key ma le Palemia o Samoa, le Susuga Tuilaepa Lupesoliai Sailele Malielegaoi na tatala faatasia lenei maota a o molimauina e le mamalu na valaaulia mo lea aso tāua.
