E 17 tausaga o le malaga taamilomilo a le ekalesia a le Word of Life, i le tau sailia o se nofoaga tumau e faamautu i ai, o le faamatalaga lea a le susuga le faafeagaiga Ps Tavale Matai‘a. Ae ua taunuu le faamoemoe ma ua sii le viiga ma le faafetai i le Atua, lea ua tatalaina aloaia le malumalu fou i se sauniga faapitoa na faataunuuina i le Aso Toonai na mavae atu nei.
Saunoa le faafeagaiga, “O se tofa mamao na ou maua mai le Atua i le tausaga 1995, i le vaitaimi sa ou lauga ai faa-Faievagelia i Ueligitone, sa ou faitau ai i le Mataio 9 ma ou lagona ai le musumusu mai o le Atua ia te au, e amata se galuega, ona e toatele tagata e moomia se aiga mautu, e faafaileleina ai o latou olaga faaleagaga, aemaise le toatele o tagata, e moomia se tamā faaleagaga”.
“O le taimi foi lea, o loo avea ma‘ua ma faifeau lagolago i le ekalesia a le Greenlane Christian Fellowship i Aukilani, ma o le fale o le susuga i le faafeagaiga o Asafo Avia i Ueligitone, sa ou maua ai lea faaaliga o le amata o se galuega fou pe a toe taliu mai i Aukilani.” “Sa talatalanoa ma Asafo, ona matou malaga lea faatasi i Wanganui, e feiloai ma le susuga i le faafeagaiga Iliafi Esera, mo sona finagalo, ma sa ia faamaonia mai ia te au, ma aumai lana faamanuiaga mo le tofa mamao ua tuuina e le Atua i lo‘u loto”. “Sa lē faigofie le matou galuega, auā o le ekalesia e pei o se pasi la‘upasese, o nisi ua feosoi mai i totonu, a o nisi foi ua feosoi ese atu, o nisi foi ua o ese atu, ae lē totogiina o latou pasese, e pei ona masani ai nisi o tatou tagata Samoa”, o le faamatalaga lea a le faafeagaiga, sa taliē tele ai le auvalaaulia.
Ta‘ua foi e le faafeagaiga, O nisi o faafeagaiga ma faletua sa mafuta ma tupuga mai totonu le WOL, ua avea ma faifeau o nisi o ekalesia e pei o Ps Peter & May Crichton, Ps Aukuso & May Aukuso, Ps Warren & Judy Retzlaff. O se tasi o sui o le Palemene a Niu Sila, Afred Ngaro ma lona faletua ia Moka, sa auai i lea aso, o i laua o nisi o sui faavae o le amataga mai o le ekalesia, o fanau faaleagaga a le susuga Tavale ma Alison. I le lipoti a le teutupe a le Ekalesia, le faletua ia Pua Taualapini, na ia molimauina ai le faamaoni o le Atua. I lea 17 tausaga, e tusa ma le 5 nofoaga eseese sa fai ai latou tapuaiga, o le taimi lava, ma le tagata fesoasoani na saunia e le Atua.
O se tasi o ia fesoasoani, na auala mai le susuga le alii faipisinisi o Vaaiga (Iga) Tuigamalaga, sa ia faaavanoaina ma ofoina lana pisinisi, le falemaliu Tuigamala & Sons Funeral Services i Henderson, e faaaogā mo sauniga a le Ekalesia. Saunoa Pua, “ia o le ā le mea e popole i ai, o le fale lava lea tatou te iu uma i ai”. O se tasi o tala fiafia na faamatalaina e le susuga Tavale, e ui na latou faaaogāina le falemaliu, ae i lea 17 tausaga, sa tele ni faaipoipoga, aso fanau, papatisoga, ma nisi o sauniga faapitoa, ae na te lei faia lava se sauniga o se maliu, e lei amia e le Atua se tagata o lana ekalesia. Atonu o se faamanuiaga faapitoa lea e maua i lana Ekalesia, auā i le tasi o saunoaga a le faafeagaiga, i le talaaga o le fauina o le falesa, sa ia fautuaina ai le mamalu o le auvalaaulia, “O la‘u fautuaga ia outou, ia aua ne‘i fai se mea e faatigaina ai tagata o le ekalesia”.
E toatele nisi sa momoli i ai le faafetai a le faafeagaiga, ae na muai momoli lana faafetai i lona faletua ia Alison, ma lana fanau, ona o le latou tutufaatasi o se aiga e lagolago ma sapasapaia le galuega a le Atua. Sa faatāua i le saunoaga a le faafeagaiga le mafutaga aemaise le lagolago a le susuga Ps Andy & Leone Forsgren, sa o laua lagolago malosi i le tau amataina mai o le galuega.
E pei ona silafia, o le po o Aso Gafua taitasi o loo faagasolo ai le polokalame ‘Tuutuu i le loloto’, a Ps Tavale i luga o le leitio a le Radio Samoa. O se tautua aogā tele mo le tala‘iina o le finagalo o le Atua mo tatou tagata Samoa lautele. Ma o se tasi o faamoemoe a le ekalesia, o le a amataina se latou sauniga faapitoa i le gagana Samoa i se taimi o i luma i le tausaga nei, e pei ona faalauiloa e le faafeagaiga.
O se mafutaga matagofie le maitauina o le toatele o susuga Faafegaiga ma Faletua mai soo se fata faitaulauga, aemaise o atunuu eseese sa auai i lea aso, o nisi sa malaga mamao mai atunuu i fafo. O le lauga faafetai o le aso sa fofogaina e le afioga Leota Tuivaisigano Le Mamea. I le faaiuga o le ‘aiga, sa tatala ai e le fofoga o le aso, Iga Tuigamala le avanoa mo le auvalaaulia e fai ai ni a latou saunoaga, o se avanoa lea na tulai ai le faafeagaiga Lui Ponifasio, e faaoso se siva Samoa a le susuga Tavale ma lona faletua ia Alison, e taualuga ai le aso fiafia, ma faaavanoa ai ato tupe a le auvalaaulia e fai se latou foai mo le galuega fou a le ekalesia.