O le mae‘a ai o le fausia ma le tatalaina o le Maketi i Vaitele, e lē taumate o se fiafiaga tele mo le mamalu o le atunuu o loo nonofo latalata ane ai i lea nofoaga. Ua lē o toe po foi i le silafia a le atunuu, o le nofoaga tonu lea ua tu ai le maketi fou i Vaitele, o se nofoaga ua toatele ma tumutumu i ai tagata eseese mai soo se itu o Samoa ua nonofo ai.
O se nofoaga o loo iai le tele o Kamupani ma Faalapotopotoga eseese ma nisi o pisinisi laiti, ua siisii foi le aofai o i latou ua nofoia lea vaega o le atunuu. Ma o le faia ai o le maketi fou i lea nofoaga o le a avea lea o se tasi o nofoaga autū mo feau ma fefaatauaiga a le atunuu.
O se lagona fiafia foi ma le agaga faafetai na faaalia e le alii palemia, Tuilaepa Lupesoliai Sailele Malielegaoi i lana saunoaga autū mo lea faamoemoe, ma o le faanaunautaiga lava o le Malo e pei ona ia ta‘ua, ina ia mautu lelei ma talafeagai nofoaga mo fefaatauaiga a le mamalu o le atunuu.
E lua ona fogafale ma o se fausaga mautu ma saogalemu mo fefaatauaiga, e tai foliga tutusa lava ma le maketi o loo i Salelologa i le motu tele i Salafai lea sa tatala i le tausaga ua mavae. O ni fuafuaga lava mo le lelei o nofoaga mo fefaatauaiga a le mamalu o le atunuu.
O le fogafale i luga o le maketi ua faapitoa lea mo oloa e pei o lavalava, galuega taulima ma isi oloa e lē o ni taumafa.
O le fogafale pito i lalo e mo faifaatoaga e faatau ai fua o faaeleeleaga ma o loo iai foi ma ni nofoa mo le mamalu o le atunuu e nonofo ai. E lua foi ni faleaiga mo taumafa e fia faatauina ma ave (take away) ma e 29 faleoloa i autafa, e tofu lava ma le falelēta‘ua se‘i tulou.
O le eseesega lenei o le fausaga o le Maketi lenei ona o isi nofoaga faapea i Samoa e lua ni poloka ua ta‘ua o falelēta‘ua.
O le isi eseesega o le fausaga lenei ua pei ai lava foi o Savaii, ua iai lava ma le nofoaga faapitoa i totonu o le Maketi mo le faatauga o i‘a.
O isi nofoaga faapea o iai nei e aofia ai le Flea Maketi i Savalalo, o le Maketi o i‘a i autafa ane, o le Maketi i Fugalei atoa ai le Maketi i Salelologa.
E ono konekarate na tuuofo i tauofoga o lea galuega ma o konekarate a le Maota Builders ma le Schwartz Construction na faatinoina lea galuega i lona tau aofai e $5 miliona ma le fituselau tala mo le umi e iva (9) masina.
O le tatalaina aloaia o le galuega na ootiina ai le lipine e le Minisita o loo feagai ma le Faalapotopotoga o le Samoa Lands Corporation, Faumuina Tiatia Liuga, i le mae‘a ai o le sauniga faapitoa ma faaulufale loa le mamalu o le atunuu na mafai ona auai e matamata ma molimauina lea faamoemoe.
O Vaitele lava ia, ua sili atu i le to‘a 5,000 tagata ua faamautu ai. O se nofoaga tutotonu foi i le toatele ua nonofo i Faleata auā ua iai le falemai o le lālā o le Medcen, ua iai faletupe, o faleoloa ma isi lava auaunaga ua mafai ai ona faapea o se taulaga fou ua faatuina nei i lea nofoaga.
