Talu mai le faamanatuga o le 125 o tausaga o le aoga a Malisi i Mulivai, e lei malolo galuega atiae ua faatuina e le asosi o tama ma teine aoga tuai o le Malisi ona o le manatu o i latou ua tuu atu i ai le matafaioi ma le tiute o le faaleleia o le aoga na fofoa mai ai soifua auauna o le toatele i lenei vaitaimi.
O le tele o taitai o Samoa sa aoaoina i le aoga lenei i Mulivai ma o le vaega tele o le galuega a le MBOPA e pei ona faaigoaina ai lenei Faalapotopotoga o le toe fausia o ni faleaoga ua aofia ai le faletusi ma le fale mo suesuega faasaienisi a le fanau. E lē gata i lea ua iai nisi faaopoopoga i meatotino i faleaoga o le aoga tulagalua ua faaopoopo mai i le fesoasoani lava a lenei asosi.
O le aso la o le Tutoatasi lea na molimauina ai se isi galuega o se maa faamanatu ua tuu ai suafa o Faalapotopotoga ma mafutaga aemaise i latou na velo aso uma i le faaleleia o le faleaoga ma ona totoga eseese auā lava le faaleleia o aoga a le fanau.
O le tausaga e 2013 lea na amata ai nei galuega ma e lē o mapu e oo mai lava i le taimi lenei.
E $3,000 (tala Niu Sila) le tau o le maa faamanatu lenei ae $800 le vaneina o le igoa o le asosi i luma o le faleaoga na fausia ma o tupe lava na saosao ma lafolafo i ai sui o le Asosi.
O le mae‘a la o le maa faamanatu ma le igoa o le asosi ua vaneina ma faapipii i se vaega o le aoga lenei i Mulivai, ua amata ai foi ma se isi sailigatupe, o se lulu e manumalo ai i ni taavale se tolu ma nisi o faailoga tetele o le a faagasolo i lenei vaega faaiu o le tausaga.
O se fesoasoani a le Samoa Beverages le fale gaosi ava lea e gaosia le Taula ma le faguinu o le Taxi atoa ai ma le faletaavale o le FORD i Samoa. O se tauvaga lenei o le a ala mai i se lulu ma o le faamoemoe o le asosi ia toatele i latou e lagolagoina auā o le tupe e maua mai ai e amata ai se teugatupe o le a faaaogā mo le siitaga a faiaoga i o latou totogi, o Faiaoga ia o le aoga lava ia a Malisi i Mulivai.
Na faafetaia e le alii Palemia o se tasi foi o sui o le Asosi le sogasogā o le asosi ma lana laulau i le sailiga o seleni mo le atinae o le aoga aemaise o fanau ua faapea ona aoaoina i le Marist Brothers.
Na ia faafetaia foi le sao o mātua ma faiaoga i le unaiga lava o le itu tau i aoaoga a le fanau i lea itu o le taulaga o Apia.
O le sauniga lenei na faamavae atu ai foi le aoga ma le asosi o tama ma teine tuai a le Malisi i se Felela ua 37 tausaga o galue i Samoa, o se faiaoga ma na soo lelei lava aoga a le malisi o faiaoga ai lenei auauna mai i Niu Sila ia Brian Callanghan, lea ua mae‘a lana tautua i Samoa ma ua agai atu i Niu Sila mo se isi galuega e tofia ai o ia.