O le taunuu mai i laufanua o Brisbane o lenei foi faaili sa logologoā ma aave mai tala i Niu Sila, na lei faatali le toatele ae lolofi atu se‘i faafofoga ma tagai, ae na matuā talitonu Toma ina ua vaai. Matagofie le pa‘ō ma paleni mea uma, logomālie foi siufofoga o le susuga i le alii pule ma tamaitai pese.
E moni lava tala e matuā itiiti mea na faalogo i ai i foliga sa molimauina i le afiafi o le Aso Toonai na se‘i mavae atu nei.
E lele le toloa ae ma‘au lava i le vai. O le suafa Ululama e mafua mai i se fanua i le alalafaga o Lano i Savaii, ma e pei ona silafia o lenei faaili ua lata i le 7 tausaga o lana tautua i Niu Sila, lea sa pese ai le susuga ia Mautoatasi Asuao, ma ua faamautu mai i le setete nei.
O se tasi o alo o le atunuu ua lausilafia i Kuiniselani i ana taavale la‘u pasese (taxis) ma fale faatau e lē mafaitaulia, le tofā ia Soifuagā Talitua Faraimo o le pule sili lea, ma o ia foi le Taitai Faaili o loo avea ma faauluuluga, o ia e vaaia le fale puepese ua igoa o le Hummerman Recording Studio (Lano Savaii), a o si ona faletua o Vienna Faraimo.
O nisi o le aufaaili e aofia ai Frank Sufia (Technician & Recording & Lead keyboard player); Faletui Sufia (Keyboard player); Fred Sufia (Drummer); Le‘au Sam Sili (Base player); Talitua Faraimo, Janet La‘ifai, Gia La‘ifai o loo fofogaina pese o le faaili. O le tofa ia Gaga Epa Sufia o le Faatamā ma le Faufautua o le faaili.
Na maualuga le faamoemoe i le faatasi mai o le alii pule o le faleaiga a le Sunrise mai Otara i Aukilani, le tofa ia Pauli Ozzy Retzlaff, o le alii pule foi ua lauiloa i le faaili a le Laoso i aso ua mavae.
O le fofoga o le po o le tofa ia Tamala Malatai Fiu. E ui ina lei vaaia se ‘ava malosi i lea afiafi peitai o se faamoemoe na amataina i le manuia faaiuina i le fiafia auā na toafilemu ma solosolo lelei mea uma. Toatele le aufaipisinisi sa auai ma opogi le faamoemoe faapea le loaloa o le atunuu. E momoli le agaga faafetai o le susuga i le alii pule, Soifuagā Talitua Faraimo, le faufautua ia Gaga Epa ma le aufaaili faapea le aiga sa lagolagosua, ona o le talisapaia faatuaeleele e aiga, uo ma paaga masani o le faatalauula atu i le tatalaina aloaia o le fale puepese ma le faaili a le Ululama i Brisbane, e pei ona tauaaoina ai se seleni e tusa ma le $8000 (valu afe tala).
