E sefululima tausaga o faatali le faletua ia Fale Leilua mo lana miti poo se tofa mamao na tuuina e le Atua i lona loto, o le faatuina lea o se auaunaga mo le fesoasoani i tagata lautele e auala i galuega faa Social Work.
O le Aso Faraile na tea nei, 3 o Me, na faataunuuina ai lea miti ina ua tatala aloaia le auaunaga fou ‘Yeshua Ethos’, i se tatalo faamanuia ma se upu faalaeiau mai le susuga i le faafeagaiga Pastor Samoa Unoi, lea na molimauina e le toatele o le mamalu o le auvalaaulia, aemaise susuga i faafeagaiga ma faletua i le sauniga faapitoa na faataunuuina i le Memorial Hall i Mt Eden Aukilani.
Sa faamatala e le faletua le mafuaaga o lenei tofa mamao, ina ua ia maitau i lona olaga faigaluega faa Social Work, le tele o lape o auaunaga o loo faatino nei, e lē o fetaui, e lē talafeagai foi mo le foia o faafitauli ma le fesoasoani tonu i o tatou tagata. Ma ua atili ai ona faamautuina i lona loto le tofa mamao o le faatuina o se auaunaga mo le fesoasoani i tagata e pei ona iai nei le Yeshua Ethos.
“Sa ou vaaia le tele o mātua puapuagatia, e lē iloa poo fea a sulu i ai mo se fesoasoani. Leiloa poo le ā le mea o le a fai, ina ua aveese mai a latou fanau ma tamaiti mai totonu o le aiga, e le Matagaluega o tamaiti”.
“Sa tele ina ou tagi i taimi ou te vaai ai i le faigata o talavou ua tumu i le ita, ona o uiga faasauā na latou uia. Sa ou vaai i tino o tamaiti ua manunu‘a i le sauā lē pulea o mātua. Tele aiga sa ou maitauina le matitiva, e leai ni lunch a tamaiti, e fia aai ma lē aooga ona o faafitauli i totonu o aiga”.
E pei ona molimau le faletua ia Fale, o le galuega faa Social Work, e amata mai i totonu o le ekalesia. “O se moemitiga ma se faamoemoe sa saili atu i le Atua e ala i le tatalo ma le anapogi”.
Faatasi ai ma lona alii le susuga i le faafeagaiga Pastor Nanai Aperila Leilua, o le Ekalesia Kingdomized Church, o loo ia tautua mo le faatalatalanoa fesoasoani i tagata (counselling) i le auaunaga a le Yeshua Ethos.
O le faletua ia Fale, na faigaluega i le matagaluega mo le auaunaga mo tamaiti ma aiga, le CYFS, sa faamanuiaina o ia i le Diploma of Social Work i le tausaga 1978, sosoo ai ma le faigaluega i le falemai i Aukilani, ae e sefulu tausaga o faigaluega i le Waitemata District Health Board. O le tausaga 2011, na ia faamavae mai ai ina ia faauma lana Degree of Social Work, ma amata ai loa ona tapena mo le faamoemoe nei.
O le tautua autū a le Yeshua Ethos, o le avea lea ma se auaunaga mautu e mafai ona fesoasoani i aiga ia malolosi, ma ia faaleleia atili le vafealoaloai o le tasi ma le isi. Ia toe faafoi pe toe faatumauina aiga i le faavae o le Atua, ma lana uluai fuafuaga mo aiga, ia manuia, ma ia faamanuiaina.
Na faalauiloa le aufaigaluega a le Yeshua Ethos, o i latou o tagata aoaoina lelei ua iai uma faailoga tikeri faa Social Work, ma isi faailoga tāua, e pei o Tiumalu Williams, Lanita Tivoli, Alexander & Megan Tuitama, Lumanai Pulusi, Blessing Leilua.
Sa saunoa le faletua ia Fale, ma faamatala le uiga o le igoa Yeshua Ethos. Fai mai o ia, ‘A culture helping people’. O ni tagata ua avea ma a latou tu masani poo sa latou aganuu le fesoasoani atu i isi tagata.
O le Yeshua, ‘to rescue’ ‘to deliver’, ‘ia laveai mai, ‘ia momoli atu’. O le isi lea igoa o Iesu i le faa-Eperu. O le upu Ethos o le ‘Culture or a Way of Life’, o le aganuu poo se auala ua masani ai le soifuaga.
O le susuga i le faafeagaiga ia Pastor Samoa Unoi, o le Peace Chapel i Samoa sa ia aumaia se faamalosi mai le Isaia 61:3-4, ma ia faamamafaina ai le tāua o le toe atiae o mea ua faatafunaina. O le auga o le olaga nei o le avea o tatou olaga ma faamanuiaga ia manuia ai le lalolagi.
Mo nisi faamatalaga e mafai ona faafesootai Fale i le telefoni 0279569648 poo le imeli yethosservices@ymail.com