E $2.2 miliona tala se tinoitupe ua faaagaga e le Komiti e Pulea Lakapi a le Lalolagi le IRB e atina‘e ai malae taalo lakapi fou i Tuanaimato auā le atina‘e o le taaloga Lakapi i Samoa.
E lē gata i lea ua faaopoopo i ai ma se tinoitupe e $700,000 tala Samoa mo le fausia o le nofoaga o le a faamautu ai le Aoga mo le atina‘e o le Lakapi, lea e ta‘ua o le HPU i le taimi nei ma o loo faamautu i le Iunivesite o le Pasefika i Saute i Alafua i le taimi nei.
O se atina‘e tele lenei na molimauina ai le suaina mo le uluai taimi o le eleele o le a faatino ai lea galuega, ma o le alii Palemia le susuga Tuilaepa Lupesoliai Sailele Malielegaoi lea na ia suaina le eleele e aloaia ai lenei galuega.
I le saunoaga a le Alii Palemia, o le Taitaifono foi lea o le Iuni Lakapi a Samoa, o le faatinoga o lenei laasaga tele mo le Atina‘e o le Lakapi ua faamautu ai le manaoga e faaleleia atili lenei taaloga ua tele fanau a le atunuu ua manuia ai o latou foi soifua tau atia‘e.
E lē gata i lea o se faailoga lenei o le vaai maualuga a le IRB i le tulaga o iai le taaloga lenei i Samoa.
O le fautuaga a le Alii Palemia, o le fausia o lenei nofoaga tele i Tuanaimato ua faamautu ai lava ma le manaoga o le atunuu aemaise le Iuni Lakapi a Samoa, ua uma le taimi o le faatemeteme ona faatino o lenei taaloga, ua uma foi le taimi e manatu ai o loo tele le avanoa e tau atia‘e ai le taaloga lenei ona o le maualuga ua faaali mai e le IRB e ala i tupe aumai i Samoa mo le atina‘e o le Lakapi, e tatau ai ona tali Samoa i lea faaeaea ma e tele lava auala e mafai ai ona faaleleia le taaloga ae o le tasi lava lenei auala sili, o le toleni atu lava o fanau a le atunuu e ala i le Aoga lenei mo le tomai o le Lakapi.
O le vaiaso foi lenei na faalauiloa ai i latou ua maua tusipasi i le tomai faalaufali, le tomai faafaiaoga ma le tomai faapule i au taaalo ma na molimauina ai foi tamaitai ua ofi ma lotolotoi ai i nei taumafaiga.
Ua mautu foi taaloga lakapi a tamaitai ma o se tasi lea laasaga e lei ausia i le taimi nei, o le iai o ni avanoa mo tamaitai e taaalo lakapi ina ia atia‘e ai le latou tomai i lenei taaloga ma a‘oa‘oina ai i le HPU.
O le taimi lenei na o alii o loo faataga ona auai atu i nei a‘oa‘oga ma o i latou nei o loo fafagaina le Manu Samoa i le taaloga taitoa 15 ma le au a le atunuu taitoa 7. O le amataga o le tausaga na momoli mai ai se upu malosi mai i le IRB i le Iuni Lakapi a Samoa ina ia mafai ai ona unaia le atina‘e o le Lakapi i le atunuu.
O lea lapataiga, ua ta‘ua ai le tele o le tupe ua sasaa mai e le IRB ae na o le taitoa 7 lea e vaaia le maualuga o le atina‘e ua iai ae o le ‘au tele a le Manu Samoa, e tatau ona iai se suiga o lana taalo a o lei oo atu i le Ipu o le Lalolagi.
Lea la ua vaaia ai le tele o femalagaaiga a le ‘au tele auā lava le tau sailiga o sana ‘au lelei mo le Ipu o le Lalolagi, ma o lea foi ua faagaioi le galuega tele lenei auā le tali atu i manaoga o le IRB ia faaleleia atili ai le lakapi i le atunuu.
