O le falepuipui fou ua faamoemoe e tatalaina i le masina fou

Ua mautinoa le tatalaina o le falepuipui fou i le aso 28 o Iuni o le tausaga lenei.  O le faamaoniga mai i le Komesina o Falepuipui i Samoa, Taito Saua Edward Winterstein, lea na ia faalia o lo o matua solosolo lelei galuega faaleleia o le falepuipui i Tanumalala, ma e maea ao lei oo i le aso e tatala aloaia ai.

Ole tau atoa o le galuega e 10 miliona tala, ma afai ae maea galuega ma tatala loa, o le faamama avega foi lea i le galuega o lo o fai nei i le toese i Tafaigata.  O le atugaluga lava o iai ile taimi nei, o le le lava lea o potu e la’u atu iai tagata solitulafono ua faasalaina e le faamasinoga.

Ua faalia e le minisita o falepuipui, Tialavea Tioniso Hunt, o se tasi lea o mafuaaga e ala ai ona sosola i tua pagota i Tafaigata, aua e fa’i o le le lava o tagata faigaluega, ae o le le saogalemu o le falepuipui o lo o i ai nei.

“O le falepuipui fou ua fausia i se fausaga e pei o falepuipui i atunuu mamao, e aofia ai se nofoaga maualuga, tai pei o se olo matamata, e mfai ona maua uma ai soo se pagota e sola i tua.”

“ E le gata i lea, ua faaopoopo isi potu fou, ma e tele atu i lo le falepuipui i Tafaigata.” E oo mai i le taimi nei, e le’i maua lava pagota ia ua sosola i tua, ma o le talotaloga ale minista, ina ia aua nei toe sosola i tua nisi  pagota, ae ua lata ina maea galuega o le falepuipui.

O le sailiga foi o pagota ia ua sosola o loo galulue ai le Matagaluega o Leoleo, ma le Ofisa o Falepuipui. Ma e oo mai foi ile taimi nei, o loo i tua pea le alii pagota 59 tausaga le matua o Suitupe Faamoe Paufai mai Vailuutai, Faleatiu, Fagamalo Savaii, lea o loo tuli lona faasalaga i le fasioti tagata faamoemoeina.

Ua savali nei i le 2 vaiaso talu ona sola i tua lea alii. Ua toe maua leisi alii o Silao Leleiga, lea na taofia atu i le fale puipui, e faatali ai le aso o lona faamasinoga. Ae sei vagana ai le alii pagota o Pati Chong Nee, lea ua atoa lelei le 5 masina o saili pea e leoleo, poo fea se vaipanoa o lafilafi ai lea alii.

Ma na faalia foi ele Komesina o Leoleo, Fuiavailili Egon Keil, o lo o taumafai, leoleo  i le mea e gata ai lo latou  mafai e saili lea alii, ma o lo o faalagolago foi i le atunuu mo ni faamatalaga e mafai ona avatu i tagata o le atunuu. 

“O le tele a o faamatalaga o lo o o matou faaogaina peitai e tele foi ina taunuu atu leoleo ua leai foi nisi i nofoaga o lo o faailoa mai e tagata.”

O le le saogalemu ma le popolega o le faatumulia o le falepuipui i Tafaigata, o se tasi lea o vaega na afea ile faaiuga a le tamaitai faamasino, Tafaoimalo Leilani Tuala Waren i le tolaulauina o lana faaiuga i le toe faafoi i Tafaigata o Tagaloasa Filipaina ma le tama o lona tuafafine, o Ovaleni, lea o loo loka pea i le fale leoleo i Apia.

O le faasee ane o Filipaina ma Ovaleni e tuli ai lo la faasalaga i le Ofisa o leoleo i Apia, ona e mafua mai ina ua masalomia i lo la taupulepuleina o se solaaga a pagota  i le afiafi tonu na aafia ai Samoa i le afa o Gita i le tausaga ua mavae.

O se vaega o le faaiuga a Tafaoimalo, na ia faalia manino ai, seiloga e faamalieina le komesina o falepuipui ma le komesina o leoleo, pe a maea ona iloilo Filipaina ma Ovaleni, i le taofiga o loo taofia ai i Apia, ona fataoa iloa le pe agavaa ona ave i Tanumalala pe a mae’a le falepuipui fou.

Ae o le aano tonu lea o le tau faavavevave  o le falepuipui i Tanumalala ia mafai ona taofia uma ai soo se pagota i Samoa.