E $233,030 tala Samoa le tupe na faamatuu atu e le Malo o Iapani i lana fesoasoani mo le fausia o le faleaoga tulagalua a le afioaga o Vaiee i Safata.
O se sauniga na valaaulia ai le sui o le Malo o Iapani i Samoa atoa ai ma sui o le Matagaluega o Aoga e fai ma sui o le Malo.
O se tasi lenei o faleaoga na faaleagaina vaega i le afā o Eveni ae ua tuai foi ma lē mafai ai e le fanau ona toe faaauau le faia o aoaoga i nisi o vaega o le fale.
O le galuega fou na faapea ona faaopoopo ai potu aoga e fā, o se faletusi ua faatotogaina, o se potu o faiaoga, ma potu mo le aoaoina o mataupu faasaienisi ma mataupu tau computers. O se galuega na faapea foi ona fai sao i ai le afioaga e ala i lana komiti o le aoga ma mātua auā o le tuutuuga lea o fesoasoani nei a le malo o Iapani, e iai lava le sao e mai i le afioaga e talosaga mo galuega tetele faapenei.
Faaalia e le Amepasa o le malo o Iapani i Samoa nei, ia Tuimaugaoalii Kazumasa Shibuta, o le iai o faleaoga fou mo le fanau, o se auala lea ua faamautu ai le faaleleia o nofoaga e talafeagai mo aoaoga a le fanau laiti. Na ia ta‘ua o le fesoasoani a lona malo ua faia ina ia ogatusa ma le fuafuaga o atinae faataatia a le Malo o Samoa lea ua ave ai le faamuamua i aoaoga faapea foi le soifua maloloina.
Ua tele faleaoga o le atunuu aemaise i nuu i tua ua mafai ona fausia i le fesoasoani faaauau a le Malo ma tagata o Iapani ma o se tasi lenei o le silia i le 10 o faleaoga ua tatala i lenei tausaga i lalo o le fesoasoani i nuu i tua a le malo lenei.
O le tausaga e 1991 lea na amata ai lenei fesoasoani tele ma o se fesoasoani e lē o se nonogatupe ae ua auina sa‘o mai lava mo le atinae o aoga.
