E lua tausaga talu ona tapena ma sauniuni le galuega a le Atua e le susuga ia Viliamu ma le faletua ia Josie, lea faato‘ā tatala aloaia i se sauniga faapitoa, o le faapaiaina ma le tatalo faamanuia i le galuega aemaise le vasega o ta‘ita‘i.
Ua faaigoaina le ekalesia o le Gracepoint Community Church i totonu o le aai o Greystanes, NSW Sini Ausetalia. E silia i le 20 aiga poo matafale ua maopoopo i totonu o lenei galuega.
O se maitau a le sui o le Samoa Times na auai i le sauniga, e toatele i ulugalii talavou aemaise le augatupulaga ma le fanau laiti.
O sauniga o le Aso Sa o loo faaaogāina le gagana peretania e pei ona saunoa le susuga i le faafeagaiga, na tatalo i le Atua i se taimi e amataina ai se sauniga i le gagana Samoa, ae peitai, ua na o ulugalii Samoa na ola a‘e i Niu Sila ma Ausetalia o loo gasolo atu, ma ua mautu ai loa le tonu, o le a faia pea sauniga lotu i le gagana peretania se‘i iai se taimi.
O le ekalesia fou o se lala na totōina ma faatuina mai i se tasi o Ekalesia i totonu lava o Sini lea o loo taitaia e le susuga i le faafeagaiga ia Tom Meredith ma le faletua ia Carol, le Whalan Community Church.
O le susuga i le faafeagaiga ia Viliamu, o lona tuaa o Aufai Upuese o se tasi o tamalii iloga o le atunuu sa avea ma asiasi aoga mai le alalafaga i Saleaula i Salamumu.
