Tatala aloaia Ekalesia AOG Palagi i Loganlea

O loo sologa lelei ma manuia le Ekalesia AOG Palagi i totonu o le Pulega a Kuinselani.

Ua sefulu ma le fā nei Ekalesia i Brisbane ina ua tatala aloaia ma avea o se aulotu faavaeina le Ekalesia i le aai o Loganlea, lea o loo tausia nei e le susuga ia Ps Mulaulau ma le faletua ia Faamelea Faaumu.

O le Aso Toonai aso 4 o Fepuari na malaga mai ai le Taitai Aoao o le Matagaluega a Ausetalia o loo alala i Melepone, le susuga ia Ps Onesemo Pulepule e faapaiaina le faifeau ma le Ekalesia. Sa mafai ona malaga mai ai foi ma sui o le Komiti Faafoe a Ausetalia le susuga ia Ps Tito Fepuleai ma le susuga ia Alofi Tuigamala mai Sini.

Sa taitai le sauniga e le failautusi aoao a Ausetalia, susuga ia Komisi Lealamisa, ona sosoo lea ma le upu faauuina a le Atua sa fofoga e le susuga ia Ps Enele Tailiki o le teutupe aoao a Ausetalia.

O le taitai aoao ia Ps Onesemo Pulepule sa nafa ma le sauniga faamanuia ma faapaia ai le faifeau, ia Mulaulau ma le faletua ia Faamelea faapea le Ekalesia, sa avea o se taitai o se mafutaga i ni nai tausaga ua mavae.

O le susuga i le faafeagaiga ia Mulaulau Uili o se lupe faalele a le afioaga o Solosolo ma le faletua ia Faamelea Faaumu e mai le alalafaga o Lano i Savaii.

Na alo i se taumafataga tele sosoo ai foi ma faaaloaloga masani auā le aufaigaluega a le Atua faapea le auvalaaulia. O le tofa ia Fata Peteli ma le faletua ia Losa Masefau o le Matauaina’s Takeaway sa tapenaina le fofoga taumafa. O le tofa ia Tauti Tovila sa fai ma fofoga o le Ekalesia.

Na momoli foi le agaga faafetai o ē na potopoto e tali faitau, sa fai ai ma sui o le komiti ma le auvalaaulia le tofa ia Lealaitagomoa Lealofi Lausei Pritchard, ona o tu ma aga masani a le atunuu sa pa‘au ma milomilosia ai le Ekalesia a Loganlea.

O lea lava sauniga paia na molimauina e Ekalesia uma o le Pulega, e pei ona auai le Taitai o Kuiniselani, le susuga i le Toeaina ia Ps Alaivanu ma le faletua ia Va Toma.

E lē gata i lea o le aao tusitusi le susuga ia Ps Manuula ma le faletua ia Foloi Nai, faapea le teuoloa, le susuga ia Ps Motu Elia.