E ui o se uluai taimi lea ua faapa‘ō ai ma faafiafia le Sei o Aana i le aai o Kuiniselani, ae ua taunuu ai lava le ‘agaga o loo a‘e nei, e matuā selau pasene le tuu atu o le Sei o Aana i le tauvaga a “Tama Matu” e lē o se Tama Mosi.
O se faaili na amataina mai i Kalaiesetete i Niu Sila i tausaga ua mavae ma o lea ua ofi mai se‘i tautua le atunuu aemaise le autafafao a Brisbane.
Na lei solomuli le au eva i le musika sa lolofi atu se‘i tagai i le aave mai tala o le Faaili a le Sei o Aana i lona uluai taimi i luga o faalagamaea tau faafiafiaga, auā sa lei o masalosalo tagata i le fia maimoaina o le faaili malie i ni ana foi musika ma sona pa’o.
Na muamua mea i Matautu Sa e ala i se sauniga lotu amata sa tatalaina ai i le po o le Aso Toonai 14 o Ianuari, saunia e le susuga i le Sui Epikopo ia Ionatana Elisaia, o ia foi sa fai ma fofoga o le po.
Na faaalia e le susuga i le taitai faaili o Pamanauato ma le faletua ia Karaponi Pau, na lei manatunatu i se tulaga uigaese sa la vaaia aemaise ai le aufaaili ma aiga uma sa lagolago, ma o se lagona fiafia tele ia te i latou uma ina ua ta ane le 9 ua faatumulia le hall o faafiafiaga i Wacol e lē gata o fafo a o totonu.
O se faamoemoe na molimauina le lagolagoina e lē gata o le Itumalo o Aana o alala i Brisbane nei o nuu Tuaoi faapea uo ma ē masani.
E lē tau faailoina le ‘au o le paipa auā na tu lava le Isaraelu ia ma alu atu se‘i opogi le faamomoe o le uso moni ma le tuafafine moni. O nisi i totonu o lenei faaili e aofia ai le Taitai Faaili ia Pamanauato Pau. O le sui taitai, o le susuga ia Vaosa Sialei Pau, ma nisi nei o i latou e aofia ai Viliamu Tivalu, Dane Tivalu, Eseta Pau, Schwenke Pau, Kiki Solomona (Asau), Mutiatai Pau, ma Thomas Pau.
O i latou uma nei e o mai le alalafaga o Faleatiu se‘i vaganā ai Kiki Solomona mai le alalafaga o Asau. O le uluai taimi ae na matuā faamalieina le faaili a le Sei o Aana i le seleni na o latou tauaaoina e sefulu afe ma ona tupu.
Momoli atu ai le agaga faafetai tele mai le Susuga ia Pamanauato ma le faletua ia Karaponi Pau, le aufaaili ma le aiga atoa ona o le lagolago mai a le paia ma le mamalu o le atunuu i le faamoemoe. Faatutumu e le Atua mea uma ua faagaogaoina aemaise i latou na agalelei i Siva Samoa. Faafetai! Faafetai! Faafetai lava!
