O se uluai taimi lenei ua faaiila ai i Melepone le taleni a se tasi o alo o Samoa ua lauiloa i le tautuaina o le atunuu i Aukilani i le Radio Samoa 1593am, le susuga ia Lenni Ropati Mamea.
O le aso lava lea na to‘ai taunuu mai ai le faigamalaga i Melepone, na alo atu ai Lenni ma le nofoaalo ia Jireh ma Jiroh e faaofo le aumaimoa i lea foi taumafaiga o le ailao naifi.
A o alo atu le alii faasalalau a le Radio Samoa i le taaloga, na pei o le masau o le uu a vaalele tau le felue o ulu o le aumaimoa a Melepone i le ofo tele i le maoae o le tomai o le alii aemaise nai ona alo.
O nisi sa memumemu lemu faapea “auoi tafefe toeititi lelea mai se naifi lavea ane ai se isi”.
Na pei lava o le toeaina foi lea na alu i le faletifaga i aso la, a faata mai le fana i le ata ae ‘alo toele ai i lalō, a timu mai ae tetee le faamalu, a o la i totonu o le tifaga. Ua leai lava se eseesega ma uiga vaaia na oo i ai lea po, talu ai faiga a le alii o Lenni ma ona alo.
O le tau a Melepone sa mālūlū i lea po, ae na matuā sisina afu o le aumaimoa i le uigaese ma le matautia na faatepa i ai latou e le alii o Lenni.
E lata i le 8 i le 9 faaaliga ailao naifi sa faia i lea po. I se faatalanoaga ma le sui o le Samoa Times pe faapefea ona ia mauaina lea tomai, sa ta‘ua ai e Lenni, ‘E leai ma sona fefe, ae ona o le toaga lava e sasau le agaese i le sasaina o le vao ma le faato‘aina o faatoaga a o galue ai o ia i faatoaga e tautua le aiga i Samoa’.
O inā sa ia mauaina mai ai lenei tomai aemaise lona vaavaai pea isi ona tamā ma se tasi o ona uncle i Samoa. O le itu e ofo ai ona o le leai ma se taofia o nei sapelu i le malae vaalele, ae na taunuu manuia mai lava ma faaaogāina lava i le faamoemoe i lea po o le Aso Toonai na tea nei.
Sa avea le failautusi o le Ekalesia LMS Toefuataina i Melepone ma fofoga o le po le susuga ia Tautaimaalii Augafaapae. O le faaili lauiloa i Melepone “Mauga o Fao” sa faafiafia i lea po.
O le susuga ia Lenni e mai le alalafaga o Vaivase, Saleaula ma Toamua ae o si ona faletua ia Solly Mamea e mai alalafaga o Siusega, Aopo ma Saanapu. O le susuga i le Toeaina ia Rev Faiumu Pio ma le faletua ia Koleti sa faamautu i ai le faigamalaga.
