O le faaipoipoga o le lasi laasaga lea e taula i ai faigamea i se mafutaga faaleuō a se tamaitai ma se alii, e amata ai se aiga fou, o le tuufaatasia lea e ala i lenei sauniga paia o le Sakalameta.
E lē gata ina uma ai le pologa o se alii i mafaufauga ae faapea foi le tamaitai ia, ae sili ai ona tausisia ala e pei ona finagalo i ai le Atua.
Leitioa foi a fetalai Ieova i le Kenese 2:18: “E le lelei ina toatasi o le tagata; ou te faia sona fesoasoani e tatau ma ia”.
O le Aso Toonai, aso 5 o Fepuari, sa makaina i le kalena a le tofā ia Tapusoa Matthew Faaumu ma lana manamea, le tamaitai o Veronica e osia ai le feagaiga ma amataina se faavae fou i lo la soifuaga.
O lea lava aso sa atofaina e faamanatu ai ma le 21 tausaga o Tapusoa Matthew Faaumu ma ua atoa nei le 3 ma le ‘afa tausaga talu ona iloa e le isi le tasi.
Na saunoa le alii faaipoipo e faagaeetia lona agaga i le fiafia ona ua tali le Atua ma faataunuu o la manaoga, ona e iai lava faafitauli o lenei soifuaga ae o lea ua tau lau o lo la faamoemoe e pei ona faatumulia ai i aiga ma uo faapea auauna paia a le Atua.
O le sauniga sa taitaia e le susuga i le toeaina ia Ps Andrew Schmidt o le Ekalesia Voice of Christ.
O le susuga i le toeaina ma le faletua ia Lagi o loo tausia le ekalesia i Logan City. Sa faapea foi ona auai nisi o faafeagaiga e pei o le susuga ia Ps Pou‘oa Tavita ma le faletua ia Seu faapea le faafeagaiga ia Ps Onofa ma le faletua ia Leata Sepelini.
E tele aiga sa malaga mamao mai e fia auai ma molimauina lea aso tāua o le fanau.
O mātua o le alii faaipoipo o le tofā ia Tapusoa Esekia Leu Taupo (Tufulele) ma le tinā ia Kuini mai Saina i Toamua.
O le tamaitai faaipoipo o lona tamā o le Maori ma si ona tinā o Miriama Pritchard mai Vaigaga.
O lē sa fai ma fofoga o le aso o le tuaa lava o le tina ia Kuini, le tofā ia Taliaoa Tuipalusami Sione. Sa maualuga tapenaga a le aiga e ala i faaaloaloga masani auā le aufaigaluega a le Atua faapea le auvalaaulia, ma o le susuga ia Tua Patea sa momolia se faafetai i aiga na lua e tusa ai ma palapala a malo ma le maualuga o faaaloaloga.
O le faleaiga lava a le tamā matua ia Poulava Sam ma Lorna Matautia, le Uncle Sam’s Catering sa tapenaina le fofoga taumafa. Manuia le aiga fou Tapusoa Matthew Faaumu ma Veronica Taupo!