E pei ona faatāuaina pea lenei faamalositino e fai ma faasiliga malosi i soo se tasi, o loo maua pea le avanoa e auai mai ai soo se tasi i po o Aso Gafua ma Aso Lulu.
O le tāua o lenei fuafuaga e faufautua ai pea ia i latou o loo faasolosolo atu ina siisii le mamafa ma ova pauna ina ia utagia o loo mafai ona maua le avanoa e te faamalositino ai e aunoa ma se totogi.
E iai nisi e lē amanaia peitai o loo alu pea le taimi ae o se vaega lē talafeagai pe a lē atoatoa le malosi ona ua ova le tausami ae lē lava le koleni.
E pei ona faanatinati ai e le tamaitai fomai pasi i nei aoaoga e mafai ai ona silafia le faia o ni galuega laveai e faaola ai se tagata e oso faafuasei se gasegase, a o maua le to‘a, leai se popole a o tālia le ambulance.
Ua talisapaia ma le agaga fiafia ma le lagona faafetai lenei faamanuiaga, ma ua iai le faamoemoe o le tamaitai fomaipasi ia Tauile‘ave ma le susuga ia Sevaaetasi Sa Togia Foua e toe faaalu le isi 30 e maua ai nisi tusipasi CPR mo i latou na latou lē mauaina le avanoa ua tuanai.
Saunoa le faletua poo le tamaitai fomaipasi ia Tauile‘ave, e faafetai ua o la maua lenei avanoa faaauro e mafai ai ona faalautele le la agaga fesoasoani i le community Samoa i Brisbane.
O le faatupeina o le hall mo masina uma ma nisi vaega o loo mafai ona faafaigofieina e ala i faaaloaloga a le Enchiro Laei & Containers (Galumalemana Naea Harry ma Apu Timoteo); ABPS PTY & Top Fencing (Lealaifola Lui & Leigh Leutu Savelino); Panel & Paint (Tavita & Logo Sione); Leu Liu Transport (Leu &Vai Liu) Monavie (Rosita & Opetaia Sione); Frank Frost Taekwondo faapea le faletaavale a le susuga ia Dean.
E lē mafai ona matou mafai se mea pe ana leai la outou lagolago malosi. Faafetai foi ia i latou o loo faatāuaina nei avanoa lē au maua.
Manatua pea lenei faamalosi e leai se totogi i afiafi o Aso Gafua ma Aso Lulu amataina i le ‘afa o le 6 i le afiafi (6:30pm).
E fesoasoani lenei tautua lē faatuāoia i si o tatou atunuu i soo se vaega o Brisbane. Talia soo se tasi.
