Tasi le tausaga o le tautua a le Young Ulalei mo Melepone

O le aso sefulutasi (11) o le masina o Iulai i le tausaga na tuanai atu 2012, na tatala ma amata aloaia ai le tautua a le Faili malosi a le Young Ulalei mo le mamalu ma le paia o Samoa o alala ma papaaao i le aai o Melepone.
O le afiafi o le Aso Faraile na se‘i mavae atu na faatumulia ai le maota o faafiafiaga i le pitonuu o Hampton Park, i le maave eseese o Samoa mai ona tupu ma e‘e, paaga ma uo a le faili, mamalu i le auvalaaulia aemaise o le aufaigaluega paia a le Atua, e patipatia ma molimauina le tasi tausaga talu ona tautua le Young Ulalei mo le atunuu.
O le Fofoga o le faamoemoe o le susuga lava i le alii pule o le faili, le susuga ia Taupau Faasalafa.
Na muamua lava mea i matautusa e ala i le sauniga lotu na taitaia e le susuga ia Bishop Asiata aemaise o le lagolagosua a ona fesoasoani le susuga ia Elisara Su‘a ma le susuga ia Setema Fina‘i.
Na mae‘a ona sosoo ai lea ma le vii o le aso fanau ona feulaina lea o le keke e le susuga ia Taupau Faafua, ona alo ai lea i le taumafataga tele na saunia e le alii pule o le faili ma le aiga alii, faatasi ai ma faaaloaloga masani faaleatunuu auā le aufaigaluega a le Atua, ma alo ai loa i le faafiafiaga (siva) tele o le afiafi, lea na matuā leai se ofi o le malu i paaga ma uo, o aumea mamae ma Samoa uma na afifio atu e faaalia le agaga lagolagosua i lenei anavatau saili malo o loo faafiafiaina finagalo o le atunuu i faamoemoe tetele o Ekalesia eseese ma afioaga, aiga ma soifua taitasi.
O tala o le fiafia ma le finagalo faamalieina na saunoa i ai le valaaulia ina ua ta‘ape le filialii.
O le faili malosi o loo pulea e le susuga ia Taupau Faasalafa Opapo, o le taitai faili o le susuga ia Ufiufi Finau, o le teuoloa o le susuga ia Laufiso Toaiva, o tamaitai o Jacinta Mulipola, Losi Letele ma le fesoasoani a le tamaitai o Valencia Fesolai sa tauva i le X Factor a Ausetalia, o alii o Suelaki Sapolu, Irama Ekeloma, Malu Poasa, Lokeni Evile, ma le alii o DJ Noiz  Faasala Jnr.
Ia faalautele e le Atua lo tou valaauina, ma ia manuia ala uma o le Young Ulalei.