O taaloga mo i latou e logonoa (tutuli) ma lē mafai ona tautala (gūgū), e ta‘i 4 tausaga ma fai.
O taaloga faasolo lava a Setete eseese o Ausetalia, ma o le Aso Tofi, aso 12 o Ianuari na amata faasolo ai foi nei taaloga i le pitonuu o Geelong, i le aai o Melepone i Ausetalia.
O le Australia Deaf Games, na amata faasolo mai i le tausaga e 1964, ma o le 16 ai lenei o taimi ua faataunuuina ai.
Peitai o le tausaga e 2008 na ofi mai ai le au taalo mai Niu Sila, lea foi na molimauina lo latou taupati i le tele o taaloga sa tauva ai.
Ae o se itu na faafiafiaina ai le mamalu o Samoa o alaala ma papaaao i Melepone, ina ua faasalalauina i leitio o tautua ai nisi o tamalii o le atunuu, le au masii mai Samoa lea ua mafai ona tauva mo le uluai taimi i nei taaloga a le malo tele o Ausetalia, faapea foi ma se au mai Fiti. E to‘a 14 alo ma tamafanau a Samoa na autovaa mai mo le faamoemoe.
E na o le volipolo i le oneone (beach volleyball) le taaloga sa tauva uma ai i latou, i vaega eseese; o au a tamaitai, au a alii ma au sa fefiloi ai alii ma tamaitai.
E ui o le uluai taimi lenei ua ofi ai se au mai Samoa, ae i le maitau atu e tusa ma saunoaga i le po na tapuni aloaia ai taaloga, sa matuā faafiafiaina lava le Komiti Faafoe i Ausetalia, ona o le agaga tausinio ma le taumafai o nai a tatou tamafanau, lea na faamanuiaina ai i le pine auro le au fefiloi to‘a 4, ae maua le pine siliva a le au to‘a 2 a tamaitai.
O le Fono Faufautua a tagata Samoa i le Setete o Vitoria o loo taitaifono ai le afioga ia Lemalu Tevaseu Satupai, sa nafa taulimaina faaaloaloga ma fesoasoani mo la tatou au a o iai i laufanua o Melepone.
E lē gata i le feiloaiga ina ua to‘ai taunuu le malaga i le malaevaalele faavaomalo i Melepone, na faaulaina ai le malaga i ulalole, o nai meaalofa ma nai seleni auā le taamilosaga, ae o le sauniga ma le ‘aiga faamavae ina ua mae‘a le taamilosaga, i le Aso Toonai, aso 21 o Ianuari.
Na amata lava foi i le sauniga lotu sa taitaia e le faafeagaiga faamalolo ia Apelu Amosa o le E.F.K.S., sosoo ai ma le saunoaga faafeiloai a le failautusi o le Fono, le susuga ia Papaliitele, ona tufaina ai lea e Anthony Faamulia o le sui mo autalavou a le Fono, ni meaalofa mo le Malaga.
O le saunoaga autū o le aso na saunoa i ai le afioga i le taitaifono le afioga ia Lemalu Tevaseu Satupai, ma tauaaoina ai loa ma le meaalofa tupe e tasi le afe tala mo le malaga.
Na fai ai ma le taumafataga ma faaiuina ai le aso i faafiafiaga a le autalavou a le Uniting Church, ma nai siva a le au malaga ae taualuga ai loa i le saasaaga a le faafeagaiga ia Apelu Amosa.
O le Hall a le malumalu o le Uniting Church i Geelong o loo tausia e le susuga i le faafeagaiga ia Sani ma le faletua ia Temukisa Vaeluaga na fai ai le faamoemoe.
Na vaaia le faafiafiaina o nai a tatou tamafanau ona o le lagolago ma le fesoasoani a le Fono, faatasi ai ma nisi o le atunuu na auai atu i le faamoemoe.
E ui o lo latou uluai taimi lenei ua tausinio ai, ae o lea ua ‘ula i le Pine Auro ma le Pine Siliva.
O le aai o Adelaide i Ausetalia o le a fai ai taaloga nei i le 2016.
