Tasi le Aso mo le Tutoatasi ma suiga o le olaga

E lei faailoaina mai le tapenaga ua autasi i ai le Malo e ala i le komiti o le faailogaina o le tutoatasi o lenei tausaga i se polokalame, ae ua iloa i ni sailiiliga sa faia, e na o le tasi lava le aso o le a faamanatu ai le atoaga o le 51 tausaga talu ona tutoatasi motu o le atu Samoa mai Upolu e oo i Savaii, ua na o le Aso Toonai lea e pa‘ū tonu i ai le aso muamua o le masina fou o Iuni.
O le itu mautinoa o le a faia le sauniga lotu i le afiafi o le Aso Faraile 31 o Me, a o lumanai le aso muamua o Iuni, ona sosoo ai lea ma le sauniga masani o le siiina a‘e o le fu‘a o le saolotoga i le malae o Tiafau i Mulinuu ma faagasolo ai savali ma tulai faaaloalo e pei ona masani ai i tausaga taitasi.
O faafiafiaga faaleaganuu e pei ona masani ai o le a faia i le aso lava lea, ma se fiafia i le po ma mae‘a ai polokalame o le Sisigafu‘a poo le Tutoatasi. E leai se aso malolo e pei ona masani ai auā e tua i le Aso Toonai ma le Aso Sa, ona toe faaauau ai lea o galuega ma feau masani i le vaiaso e sosoo ai.
O le faamanatuina o le iupeli auro poo le limasefulu tausaga o le Tutoatasi i le tausaga ua mavae, e oo mai i le taimi nei e lei faalauiloaina faalauaitele se lipoti a le komiti o tapenaga i le aofaiga o se seleni na faaalu ai pe a fua i le tau sa faailoa e le komiti o le faamanatuina o le limasefulu tausaga, e silia i le 3 miliona tala.
E oo loa ina tu lalata i le aso muamua o Iuni o tausaga taitasi, ona taulai lea o le vaai a soo se tagata Samoa, poo fea lava itu o le kelope o aumai ma nonofo ai faapea foi ia i latou o nonofo i Samoa, poo ā ni tapenaga a le Malo mo le faamanatuina o le Malo Tutoatasi. O le itu e sili ona tulimatai poo ā ni faafiafiaga o le a gasolo le atunuu e maimoa ma silasila i ai.

Suiga ua iai nei i aso o le Tutoatasi
O aso o lo‘u laitiiti ina ua ou aoga tulagalua sa ta faalogo lava i tala a ota mātua o faapea, o loo a‘o le siva a le itumalo mo le Fu‘a, pe faapea foi o loo tapena le faleaiga o le komiti a tina o le matou nuu e ave i aso o le Fu‘a.
O ia tapenaga i na aso o le laitiiti e faaosofia ai lava lagona o le fiafia ma fia oo atu ia i lena aso ae se‘i vaai poo ā ni sauniuniga o le a faia ai.
Peitai o na aso sa na o leitio lava sa maua ai tala o le Sisigafu‘a, na o le lago lava o le auvae i tafatafa o le leitio lua fasimaa ma faasolo mafaufauga e pue le ata o faamatalaga a le aufaasalalau i mea o loo fai i Mulinuu i savali faaaloalo ma le faapāpā o fanafanua, aemaise o faafiafiaga.
O le itu sa sili ona ta fia vaai lava i ai o le Ao o le Malo, auā sa na ona faailoa mai lava i le leitio ma faamatalatala mai lana afioga, faapea isi taitai o le Malo ae ta te lei vaai tino lava i ai.
O tuugavaa isi mea e sili ona faananau lota loto ta te fia vaai i ai auā a sau nei faasalalauga a le leitio i aso o soifua si tamalii o Lavea Levi, se na o lota tuinanau e fia oso ia i le pasi ae alu loa i le taulaga se‘i vaai tino, peitai o aso o le laititi e nofo lava i le fale auā e lei savavali le matou aoga tulaga lua i se Sisigafu‘a.
Na faatoa ou vaai tino i nei mea uma ina ua oo le olaga aoaoina i le aoga maualuga a lo matou itumalo ma a‘o ai siva ma faafiafiaga faapea le savali mo le sisiina o le Fu‘a. O lagona ia o nai fanau i nei aso, ae faafetai ua ola mai le latou tupulaga ua iai televise ua maua ai ata uma o le tutoatasi e nofo lava i le fale ma matamata i ai ma iloa ai poo ai ia taitai o le malo ma le atunuu, a o ia taitai o loo valaaulia e auai, e oo lava i aoga ma faalapotopotoga eseese e auai i le savali faaaloalo o le aso muamua o le Fu‘a.
O vaaiga sa iai Tutoatasi o na aso, ae ta te manatua foi na Tutoatasi pe a ta sau i le taulaga, ua na o faleaiga puligi ma tipoti koko, o falaoa faasiamu, ma kale mamoe ma sapasui ae ina‘i i se alaisa, ae sili ai ona tua i fualaau‘aina suamalie sa tele i le taulaga i taimi o le tutoatasi o le laau o le moli saina ma le moli Samoa mai nuu i Savaii e tetele ai lea laau tau faatoaga, faapea le tolo e faatutū solo i lalo o pulu tetele i le taulaga ma le maketi i Savalalo. Ua mou atu ia vaaiga ona ua telē le suiga o le atinae o le atunuu ma ua siitia foi le soifuaga o tagata e ui ina iai pea isi vaega o loo tau faaleleia.
O le tatou Tutoatasi o lenei tausaga ua na o le tasi lava le aso, ua na o le Aso Toonai o le vaiaso nei, aso muamua o Iuni 2013. E soso’o ma le aso Sa, toe amata galuega masani ile aso Gafua 3 o Iuni ae leai se aso malolo.
O tuuga fautasi e faia ile aso Faraile 31 o Me, ao isi polokalame uma o le aso Toonai. Talosia ia le faamoemoe o le atunuu ia taunuu ile alofa ma le agalelei o le tatou Atua.