E leai se tagata Samoa na soifua i Samoa nei e lē iloa le Faleoloa o Molesi. Ua silia i le 100 tausaga talu ona faatautaia galuega a le Kamupani e ta‘ua o Molesi (Morris Hedstrom) i Samoa.
O se kamupani faleoloa mai i Fiti ma o le faaiuiuga o le vaitau o le 1800 na faatu ai lenei Kamupani ae o le amataga o le vaitau o le 1900 na faatu ai i Samoa lona lala.
Ua faato‘ā savali i le lua tausaga talu ona faamuta lea tautua i tagata Samoa ma ua tapunia ai Morris Hedstrom peitai o le Pulega fou o le alii Saina e nofo i se tamaitai Samoa le alii o Frankie, na faatau mai lenei Kamupani ma faaauau ai le auaunaga o le Supamaketi ae na ia faaigoa lava o le Faleoloa o Molesi (Frankie’s Molesi).
O lea la ua tapunia foi. Na mae‘a loa faatauga o le Kirisimasi tapuni atoa loa le faleoloa lenei e i Savalalo ona o lea o le a talepe atoa lea nofoaga mo galuega faataatitia a le Faaputugatupe mo le Soifua Manuia o Tagata Samoa, le NPF.
O le pulega atoa o nofoaga nei e i Savalalo, e amata mai i le faleoloa o Molesi seia oo atu i le nofoaga o iai le Faletaavale o le ASCO Motors o le NPF e ana ma o fale uma nei se‘i vaganā ai le Kamupani a le ASCO Motors, o le a aveese uma lava ae faaavanoa lenei nofoaga mo le fale tele a le NPF lea o le a faatu ai.
E fogafaletolu se nofoaga tutotonu o faatauga ma ofisa o le a faatu ai i le eleele lenei. O se mall tele muamua lea o le a fausia i Samoa ma le faamoemoe o le a tele foi se fesoasoani i le tau omia solo ai o pisinisi i le auala lenei e ta‘ua o pisinisi o le taulaga.
Ua amata foi ona tatala le avanoa ia i latou o loo iai se manaoga e saili avanoa ai i ofisa o le a fausia i lea fale tele aemaise o faleoloa ma faleaiga o loo iai le manaoga e faatutu ai i lea fale tele.
Na faaalia e le alii o loo pulea auaunaga lautele a le NPF le afioga Tagaloasa Uili Matafeo, e lua lava tauofoga na filifili i ai le Komiti Faatonu o le NPF e saili mai ai se kamupani o le a fausia le maota tele lea a le NPF.
E tasi mai Samoa nei ma le tasi mai fafo. O loo faamautu la galuega mulimuli i le taimi nei mo le faamalieina o tauofoga nei ona faamautu loa lea o le kamupani o le a fausia lenei galuega tele.
E lē o faamautu mai foi le tupe atoa o le galuega se‘i vaganā ai le itu lea e faitau miliona tala le tupe o loo fuafua mo le NPF Mall.
Faaalia foi e le afioga Tagaloasa, o lea ua mae‘a se sailiiliga i le ituaiga fausaga o le a faatino ai le ata o le galuega, auā o se nofoaga lenei e maaleale i vaitau o timuga auā e maualalo. O le faamoemoe lava ia fausia se nofoaga e maualuga ma ia saogalemu.
E lē gata i lea o se nofoaga o le a mafai ona faatu ai ma se vaega e tele ni avanoa mo taavale e tutū faavaitaimi ai auā o le isi lea faafitauli tele ua vaaia i nofoaga faitele ma pisinisi i Apia o le laititi o le nofoaga mo taavale e faamautu ai.
Sa iai foi fuafuaga a le NPF i autafa ane o lona ofisa tutotonu i Matafele, ina ia faamautu ai se fale tele mo taavale lava latou e pei ona vaaia i atunuu mamao, peitai e lei faataunuuina lea tulaga.
O loo iai la se fuafuaga atonu o le fale fou lea o le a faamautu ai ma se nofoaga mo le paka ai o taavale.
O le tasi lenei o galuega tele ua mafai ona faatautaia e lenei Faalapotopotoga, ma o nisi o ona fanua ma maota tetele ua aofia ai se fale tele o loo faamautu ai nei le Amepasa o Samoa mo Europa, le Afioga Tuala Chang Tung i Brussels i Peleseuma.
O se tasi lea o maota ua faatau e le NPF ma o se auala ua maua ai le seleni mai i le Palemene o Europa ae faaaogā e le Sui o Samoa i lea vaega o le lalolagi auā le faamautu ai.
O loo iai foi fanua ma fale i Niu Sila aemaise foi atina‘e ua faatutu ai pisinisi ma lisi i Samoa nei.
O le seleni maua mai i nei nofoaga ua toe foi mai i le NPF ma ua mafai ona tuufaatasia i seleni maua a le NPF aua ona sui i le taimi nei.
O le galuega lenei pe a amata ua iai le faamoemoe e mae‘a i le faaiuga o le tausaga nei ae o loo faaagaga lava foi le avanoa e faamae‘a ai i le amataga o le tausaga fou pe afai e tulai mai nisi faaletonu e ono tuai ai le faatinoga o lea galuega.
Mo le kamupani a Frankies Molesi – o lea ua aga‘i i lala o lea kamupani i Lalovaea ma Vaitele le tele o ana oloa sa faatau atu i Savalalo ma ua faaalia e iai foi le avanoa e faaauau ai lea atina‘e a Molesi i le nofoaga fou lea o le a amata nei.
