Ua savali i le 24 tausaga talu ona tautua le susuga ia Vili Leilua Ieru ma lana auaunaga o le Vision Music Centre i Otahuhu e ala lea i le pueina o CDs, pueina o ata tifaga, faaipoipoga, aso fanau ma le tele o isi ana auaunaga sa tautua ai le atunuu. Mai le masina o Me i le tausaga e 1995 sa amataina ai lana tautua i totonu o lona aiga seia oo ina sifi mai i Otahuhu i le tausaga 1998 lea ua silia i le 20 tausaga o loo ia galue pea e faatino lea galuega aua le manuia o tatou tagata aemaise lava iai latou sa pueina a latou pese ma MT TV.
Na faasoloina ane i lona pueina o ata tifaga lea na vaaia ai le siitia maualuga o lana tautua i le fiafia lea o nai tagata matutua e matamata i ata Samoa aua o le tasi lea faasilgamalosi mo i latou o loo nonofo i le fale. O le tausaga 2003 na ia faatauina ai le kamupani a le Cassette World i Onehunga o se tasi o kamupani tele a Niu Sila sa fai ai kaseti.
I le lua tausaga talu ai na amata ai ona iloa le faaletonu o le maketi i le faatau a tagata, mai lava i CD pese faapea foi ma ata tifaga. O le mafuaaga o le tele o ata tiafaga o loo iai ua tele ina kopi solo e tagata pei la o Amerika Samoa o loo faatauina ai le tele o ata tifaga kopi i le $5.00, o Ausetalia e faapena foi i ona pitonuu taitasi, ua faatau kopi uma tagata i le $5.00 i le ata. Ua lē o toe mafai foi ona toe fai mai ni oka a ni fale oloa mo ata tifaga.
O Niu Sila nei o loo iai le talitonuga a le susuga ia Vili Ieru e leo mafai ona kopi e tatou tagata ata iinei ae o loo faafesoaai ata a aiga e matamata ai.
O le tele o ana ata o loo loka peitai ane ua saoasaoa le iloa o tagata i nei vaitaimi ua mafai ai ona tatala ata ma kopi solo. O le faamoemoe maualuga o pisinisi faapenei ina ia toe mafai ona toe maua mai le tupe sa faaalu i le faiga o le ata, ae o le faigata lea o le galuega ua tele le tupe sa faaalu i le faatinoina o ata ae ua le toe maua le tupe e tatau ona maua mai e le pisinisi, ona o le faafitauli lea ua kopi solo e tagata ata. E oo foi la i pese ua tau le fiafia tagata e faalogologo i cd aua ua mafai ona download mai e tagata pese i luga o le youtupe ma faalogologo ai.
Faailoa e le susuga ia Vili Ieru e iai lona talitonuga e leo na o ia o loo tulai mai ai lea faafitauli, aua o loo ia iloa ua oo lava i tagata pepese iloga o le lalolagi ua le mafai ona toe faatauina a latou CD pese ona ua tele vave auala faatekenolosi i lenei vaitaimi ua faigofie ai ona maua e tagata pese ma ata tifaga.
I le taimi nei ua lē o toe tutusa le alu a le pisinisi, mai le amataga sa iai, auā ua tele le me’i mai i lalo o le tupe maua, auā a fuafua iai e silia i le $20,000.00 le tupe e faaaluina e fai ai le ata, ae i le taimi nei a maua le tupe mai nei ata na’o le $10,000.00, o lona uiga e telē le lusi o le tupe o loo maua mai i le maketie
O le fuafuaga a le susuga ia Vili Ieru e tapuni le ofisa autu i Otahuhu ma le tele o galuega sa faatino ai, ae faaauau pea ona faatau le tele o ata tifaga ma CDs i le taulaga faatau i Magele mai le Aso Tofi, Aso Faraile ma le Aso Toonai. O loo mafai foi ona faaauau le pueina o maliu, faaipoipoga, aso fanau, pueina o pese, faapea le liliuina o cassette i CDs, video tapes i DVDs i lona maota.
O le tapunia o le ofisa i Otahuhu ua talafeagai lelei ma le faasolosolo ina matua o le soifua o le susuga ia Vili Ieru auā o lea ua faasolo foi ina ritaea ina ua silia i le 65 tausaga le matua o lona soifua.
E maua le susuga ia Vili Ieru i lana telefoni 0211427234, mo nisi faamatagala o lana auaunaga ma lana tautua i le atunuu.
