O le afiafi o le Aso Tofi o le vaiaso ua mavae 7 o Iuni na faamanatuina ai le sootaga vavalalata a le New Zealand Samoa Trade & Investment Commission (NZSTIC) ma le Samoan Business Network Event i le maota o Samoa i Magele.
O lenei faamoemoe o le faamanatuina o fefaatauaiga o pisinisi o loo faaauau pea e Samoa ma Niu Sila, ma le agaga maualuga i nei atunuu e lua ia ola malosi ma manuia lenei sootaga i le tele o tausaga o lumanai. Na auai sui o le Samoa Business Network ma le NZSTIC, faapea nisi o le mamalu lautele o le atunuu ma faauluuluga o pisinisi a le Pasefika ma i latou ua iai lo latou tomai fapitoa i lenei matata.
Na taulai saunoaga ma polokalame o le afiafi i le toe fausia lea o fesootaiga malosi i le va o Samoa ma Niu Sila. O le susuga i le tamaitai ia Laura Keil-Hall ma le susuga ia Frank Po Ching o taitaifono ia o le Samoa Business Network na saunoa e faafeiloai le mamalu o le aufaipisinisi sa auai ma saunoa i le auga o aute o le afiafi.
O se avanoa taua foi i lea faatasiga ua mafai ai ona faailoa le Komesina fou o fefaatauaiga a Samoa le susuga ia Magele Mauiliu Magele, ma o le saunoaga autu lea o lenei polokalame. Na faailoa i le saunoaga a Magele Mauiliu Magele lana galuega ma lana matafaioi na mafua ai ona tofia ia e le Palemia o Samoa i lenei tulaga, ia lelei le mafaufau ma ia faateleina ni pisinisi e tatau ona avatu i Samoa.
Na ia faamamafa foi nisi o manulauti o fefaatauaiga a Samoa o lea ua ausia i le taimi nei, e pei o le talo ua auina mai i Niu Sila, o ulu ua faafulisa mo maketi aemaise o le faaauauina pea o manuia pe afai polokalame a le RSE, e lagolagoina ai le tomai mo i latou ua galulue i galuega tau faatoaga ma galuega faufale i Niu Sila.
Na ia taua foi o le a galulue soosoo tauau ma le NZSTIC ma le Samoa Business Network faapea a latou paaga autu, faatasi ai ma fesootaiga faapisinisi ina ia faamalosia ai pea sootaga faapisinisi i le taimi nei ma maua ai le avanoa mo fesootaiga fou i Samoa.
O nisi o failauga sa auai o le susuga ia David Wong Tung o le sui faavae ma le komesina o le NZSTIC faapea le susuga ia Moananu Tyrone Laurenson, o le tamalii o loo ia faatautaia polokalame mo le High Tech Youth Network i totonu o Samoa.
Faailoa e David Wong o le tausaga e 2011 na faalauiloa ai le amataga o le NZSTIC e le afioga i le Palemia o Samoa ia Tuilaepa Sailele Malielegaoi ma le Palemia o Niu Sila ia Toosavili John Key i le faletalimalo o le Holyday Inn.
O le NZSTIC o se faalapotopotoga ua tele tausaga o iai e aofia ai ma sui o le malo o Niu Sila i le vaega o faalapotopotoga o atinae fava-o-malo ma faafetauaiga. Na iai foi o latou sui sa fautuaina le Palemia o Samoa i luga o atinae tau i le tamaoaiga i le tele o tausaga.
O Moananu Tyrone Laurenson na ia faamatalaina le tala faasolopito i le amataga o le polokalame a le High Teach Youth i totonu o Samoa lea na aofia ai ma le Komesina fou o fefaatauaiga a Samoa, i le puipuia o avanoa computer i Vaivase Tai, a’o avea ai o ia ma Minisita o aoga a Samoa.
E 800 tamaiti aoga ma le autalavou o loo mafai ona aoaoina i totonu o le polokalame a le Digital i le High Tech Project. O nei polokalame o loo mafai ona faaaupegaina ai nei talavou e ala i o latou tomai ina ia faaauauina ai pea a latou aoga e maua ai ni galuega ma pisinisi i le vaega o le IT i le lumanai.
O se poloketi na faaalia ai le lelei o le faatinoina o galuega faatino e le malo o Samoa ma paaga a Niu Sila e faamalosia ai talavou Samoa mo galuega i le lumanai ma oo ai ina fausia ni pisinisi fou i Samoa.
Na auai ai foi le afioga ia Tuala Mathew Vaea o le CEO o le SASNOC faapea le pulega o le Samoa Tag le afioga i le Peresetene ia Faaofonuu Junior Leota lea sa auai mai e faalauiloa le latou taamilosaga o le Samoa Tag i le Teuila i Samoa ia Setema o le tausaga nei.
O le afioga ia Jackie Curry o le taitaifono o le SBN Samoa sa nafa ma le faasalalauina o lenei faamoemoe, faatasi ai ma lana faasoa i taiala fou ma sini autu ma gaioiga a le Samoa Business Network i le 2018 – 2019 e ala i ana galuega faatino ma mea o le a tutupu ai.
O le tele o anavatau ma manulauti a le SBN o le a faatinoina nei, o le a taumafai lea e atinaeina ai le tamaoaiga o le atunuu o Samoa e ala lea i le la galuega vaavaalua ma le malo o Niu Sila.
