Ua tali le Atua i tatalo ma manaoga sa faananau i ai le auauna ma le faletua, ae faapea foi le aufaigaluega ma le loaloa o le ekalesia mo se taimi umi. O lagona faagaeetia ma le fiafia sa alagaina i totonu o le malumalu ma fafo ane foi o le malumalu ona o le faamoemoe ua taunuu ma lavasiga sa fuafua mamao.
O le Aso Sa, aso 28 o Novema, o le Aso Sa muamua lea o le ekalesia a le susuga i le faafeagaiga ia Alesana ma le faletua ia Eti McCarthy, le West Harbour Congregational Church, i lo latou nofoaga fou ua mae‘a ona faatauina ma faapaiaina mo sauniga lotu mo le Atua.
O le iai o se nofoaga faapitoa ma le mautinoa o le tasi lea poutu malosi i manatu ma faamoemoe o le au tautua ma le au galulue mo le Atua ma lona finagalo. E lē gata i lea o se isi foi lea faamalosiau, ma se molimau ola i le soifuaga faatuatua, ma le faatalitali i le Atua.
O se nofoaga e matautia foi lona matagofie, ona e fai lava foi si tele o avanoa ma potu mo soo se faamoemoe. E lē gata i fuafuaga a le ekalesia lava latou ia, ae atonu o le a mafai foi ona fesoasoani mo nisi o faamoemoe o aiga ma ekalesia.
E tusa ai foi ma se faamatalaga e uiga i le tau o le fanua ma le nofoaga lenei ua faamanuiaina ai le ekalesia, e ofo le loto ona o le tau o fanua ma fale i lenei vaitaimi, aemaise lava o lea foi faaitu o le aai. E fai lava si taugata, peitai o se vavega foi le maua o lea nofoaga i se tau e manatu e fai lava si pa‘ū maualalo pe a fuafua i lea foi ituaiga maketi i lenei vaitau.
O nisi o molimau sa ta‘ua ai e faapea o le tali o talosaga ma le soifua faatalitali ma le mautinoa o isi ia ki o le tatala mai e le Atua o ana faamanuiaga e lē oo i ai le iloa ma le silafia o le tagata soifua.
E tusa ai ma se molimau sa saunoa i ai le susuga i le faafeagaiga Rev Alesana, sa ia ta‘ua ai o le tausaga e 1992 na amata ai ona tau tuufaatasia le galuega. O nai aiga e toatolu sa amata ai le galuega, ma sa amataina foi i se aoga Tusi Paia sa faia lava i lo latou fale.
O le agai mai i le lumanai, sa vaaia ai le agalelei pea o le Atua e ala lea i le taitai mai o nisi o aiga ma le toatele o tagata i totonu o le aiga faatuatua. Ua sefulu ma le valu nei tausaga talu ona savavali ma faatinoina pea le galuega, ma le taitonuga e iai le aso o le a faafeiloaia ai le manaoga mo se fanua ma se fale e tapuai saoloto ai lana fanau.
Sa matuā faatumulia le nofoaga fou o le ekalesia, ona o le toatele o le mamalu o le au kerisiano sa auai ma faatasi atu i le molimauina o le faamoemoe.
E oo lava foi i auauna a le Atua mai fatafaitaulaga eseese, o uo ma paaga mamae a le faafeagaiga ma le faletua, sa agai ane ma auai i le sauniga o le tatalaina o le nofoaga fou.
O se tasi o toe ulutaia o le talalelei ma le galuega a le Atua, le toeaina ia Rev Faamalua Peteru sa ta‘ita‘i i le sauniga. A o le susuga i le toeaina Rev Lucky Slade sa folafolaina le afioga a le Atua, ma auala atu ai se upu faalaeiau, upu faamalosi, atoa ai ma faamanuia mo le galuega ua tulai mai.
Na faamae‘a fuafuaga o lea aso ina ua mae‘a ai le sauniga, i se taumafataga tele sa saunia lava e le faafeagaiga ma le faletua faapea le ekalesia. O le hall a le Ekalesia PIC i Ranui sa faia ai le taumafataga ma faaiu ai le polokalame o le aso fiafia mo le West Harbour Congregational Church.
O se avanoa foi e avatu ai le faamalo ma faamanuiaga mai le pulega a le Samoa Times ma le Radio Samoa, mo Rev Alesana ma le faletua ia Eti Fuimaono McCarthy ona o le finau ma le sailimalo mo le Atua ma lona finagalo.
O le susuga ia Alesana o loo fesoasoani mai i le polokalame o le Areto o le Ola i po o Aso Lua taitasi i luga o le Radio Samoa. A o le faletua ia Eti, o le ta‘ita‘i o le polokalame o le Toe Tepa i le Aiga i taeao o Aso Lua taitasi i luga lava foi o le alaleo a le Radio Samoa.
