“E saunia e le Atua laasaga fou i lo tatou ola”, o le manulauti lea o le Aso Sa faapitoa o tupulaga e pei ona faakalenaina e le Ekalesia Metotisi Aoao, e faatāua ai tupulaga lalovaoa o le ekalesia, lea la sa alo atu i ai le matagaluega i Kalaiesetete mo tapenaga faaleautalavou e ala i faaevagelia, pese lotu filifilia ma tala faale-Tusi Paia i le Aso Sa na se‘i mavae atu nei.
O lea lava foi sauniga sa faapaia ai ma tofiga fou o le Autalavou, Aufaipese, Aoga Aso Sa mo lenei foi tausaga fou, e pei ona iai le tausaga talu ai sa tulai mai ai le tofa Maelega Tuiono (Magiagi) i le Peresitene o le autalavou, lea la ua suia nei i le fetalaiga Mailata Fili (Salamumu) ina ua manumalo i le palota. Talu ai o le aso e faapitoa mo tupulaga, sa tofia nisi o fanau e faitauina le Tusi Paia ae o se sauniga foi sa ese lona matagofie i le tauaveina. Sa faatautaia le sauniga lotu e le tausi matagaluega, Rev Ale Palelei ae sa lagolagsua susuga i faifeau malolo, Elisara Elisara ma Lasalo Tuilagi mo le faapaiaina o tofiga fou.
E tolu vaega tetele sa vaevaeina i ai le autalavou pei o Levaula, Siaosi Palauni ma Sione Uesile faatasi ai ma le vaega faufautua ua faaigoaina o Avoka, o loo aofia ai ma nai tina ma tamā matutua. Sa faapena ona iai tapenaga faale-Agaga pei o le Pese na saunia e Levaula, faaevagelia saunia e Sione Uesile, ma le tala na tapenaina e Siaosi Palauni, o loo iai foi ma ipu faapitoa mo ē ua faamanuiaina i le manumalo.
Peitai o le vaega aufaufautua Avoka, sa ta‘ita‘i ai le tausi matagaluega, Ale Palelei ua na ona sauni o si a latou faafiafiaga e salami ai ae pito sili lava na tutu‘a tapenaga a le aumatutua nei i le taufai sesela ma le maualuluga o a latou nota faatulagaina. Maeu foi le felanulanuai o sauniuniga a vaega taitasi, o taga eseese a tupulaga e faailoa ai o latou faiva mo a taeao aemaise nuu ma le atunuu e tiu ai, o tupulaga lava o le malosiaga ma le lima taumatau o le ekalesia.
Na faaiuina lenei sauniga faapitoa i le tufatufaina o ipu ma ua tulai mai o le manumalo i le faaevagelia o Sione Uesile (ta‘ita‘i Fuimaono Moemalo), manumalo i le tala Tusi Paia ma le Taulaga o Siaosi Palauni (ta‘ita‘i Manumailagi Fetu) ma le manumalo i le Pese, togiga ma le aotelega o togi, o Levaula (ta‘ita‘i Taumai Leo‘o).
O le tamaitai talavou o le tausaga ua sola ma Elisapeta Moemalo ae o le tama talavou o le tausaga o James Ale. O le teine aoga o Tiresa Ierome na manumalo i le “best actress”. Faamalo le tau, Ua malo le tausala o le tagavai e faailoa ai ou faiva ma ia mafuta ma ola tupulaga i le malamalama o Keriso. Ina ua mae‘a le sauniga ona alo atu lea i le toonai ma le taumafataga tele, tatala le filialii ma taape fiafia i le faatasi mai o Keriso le Alii o laasaga fou.
