Ua tele lipoti o le taleni taalo lakapi a se tasi o tamafanau a le atunuu, le alii o Sonny Bill Williams, lea na sau i Samoa ina ua momotu lana lakapi liki ona o le fia ofi i se aulakapi i Farani ma fai ai lona tusifolau Samoa e malaga ai.
O Sonny Bill Williams ua faamaonia o loo aofia i le lisi o tama lakapi liki lelei o loo silasila i ai le pulega o le lakapi liki i Samoa e ono filifilia mo le Toa Samoa i le Ipu o le lalolagi ia Oketopa o le tausaga nei.
E lē o mautinoa la pe aofia lea alii taalo lakapi i le Toa Samoa ae ua faaalia e le peresetene o le taaloga lenei i Samoa, e ono mafai lava ona taalo Sonny Bill Williams mo le atunuu ona o loo agavaa auā o loo ia umia le tusifolau tagatānuu Samoa.
O le masina fou o Aperila o le a faia ai se taaloga a le Toa Samoa ma le au malosi o Tonga, ma o loo laumanuia ai atonu o le taaloga lea o le a vaaia ai ma Sonny Bill Williams i le au a le atunuu auā o se tasi o taaloga e tapenapena ai mo le Ipu o le lalolagi.
O le taimi nei o loo saili se faiaoga mo le Toa Samoa ona o le faiaoga sa iai ua toe foi e galue i le NRL i Ausetalia.
