Tapena Tausala Samoa ia manumalo Tausala o le Pasefika

Ua fai si tele o tauvaga ua mae‘a sa sailia ai se lalelei poo se Tausala o le Pasefika i Saute, e lei toe manumalo se tausala o Samoa. Ua faaalia e le alii ofisa sinia o le pulega o tagata tafafao o Dwayne Bentley, ua tapena le tausala o Samoa na manumalo i le tauvaga o le tausala o le atunuu i le masina o Setema i le taimi o le vaiaso o le Teuila, o Janine Nicky Tuivaiti, e finauina se manumalo o Samoa i le tauvaga o lenei tausaga.

“Ua sauni lava le tatou tausala i vaega lautogia uma o le tauvaga ma le faanaunautaiga ia manumalo”. O le sini foi lea o loo vaavaai i ai tapenaga a isi tamaitai e toaiva mai tausala e to‘a sefulu o le a sailia ai se lalelei o le Pasefika i le Aso Sa o le vaiaso nei (taimi Niu Sila ma Samoa) ae o le Aso Toonai lea i Amerika Samoa.

O le vaiaso atoa lenei o loo faagasolo ai le polokalame mo tamaitai tauva o loo feagai ma le komiti o le tauvaga i Amerika Samoa lea o loo talimalo.

Faaalia e Dwayne e toafitu le aumalaga mai Samoa mo lea faamoemoe ma ua aofia ai ma le tamaitai pule sili o le pulega o tagata tafafao le susuga Papalii Matatamalii Sonyja Hunter, ma nisi o ofisa sinia o le pulega.

O le tausala o Samoa o se tamaitai na faaulu mai Niu Sila, ae e lē o se tausala Samoa mai Niu Sila e pei ona laumanu‘ia i nisi o faasalalauga ma lipoti.

O Samoa o loo tumau pea ona pulea le tauvaga o le Tausala o le Pasefika i Saute. O le fono a le Komiti Faafoe o le tauvaga e faia i le vaiaso nei i Tutuila o le a iloa ai le atunuu e talimalo i le tausaga fou.

E lē o mafai ona faamaonia mai e le pulega o tagata tafafao pe o tumau pea le faiga faavae sa iai, e faatasi ona faia ese le tauvaga i se isi atunuu o le Pasefika i Saute ona foi mai lea i Samoa i le tausaga e sosoo ai.

“Ou te lē o mautinoa lelei pe o iai pea lena faiga faavae”. O le atunuu o Fiti o loo umia le pale o le tausala o le Pasefika i le taimi nei, lea sa manumalo i le tauvaga i le tausaga ua mavae sa talimalo ai Papua Niu Kini. O le tauvaga foi i le tausaga ua mavae na faailoa ai e se tasi o tamaitai tauva, ua tatau ona suia le igoa o le tauvaga i le tausala o le Pasefika ina ia mafai ona auai atunuu uma.

E mafua lea lagona ona o loo faaigoa pea o le tauvaga o se Tausala o le Pasefika i Saute, o lona uiga e na o atunuu lava o loo i Saute o le Pasefika ae lē aofia ai isi atunuu.

O se tasi lea o vaega o loo silasila i ai le Komiti Faafoe o le tauvaga i lana fono i le vaiaso nei.