O se faasalalauga faalauaitele mai le kamupani o le Transworld Distribution i Amerika i le aai o Delaware ua faaalia ai le saili e le kamupani o ni molimau e lagolago ai se latou tagi o loo tapena e tuuina atu i le faamasinoga maualuga i Samoa e faasaga i faletelevise o le TV1 i Mulinuu ma le TV3 i Taufusi Apia.
O se ofisa loia i Samoa o loo galulue ma sui o lea kamupani i Amerika i le tuuina atu o le mataupu i le tulafono e finauina ai le faasalalau e ia faletelevise e lua o loo faagaioia faapisinisi i Samoa e aunoa ma ni faatagana faaletulafono.
E lei mamao atu na tuuina atu ai ni tusi i ia faletelevise e lua na logoina ai le maua o ni mau e faasino i lo latou faasalalau o ni polokalame tau televise e aofia ai ni ata tifaga i se auala faagaoi.
Sa taumafai atu se avanoa e tapa ai ni finagalo o pulega o ia faletelevise peitai e lei manuia ma o le a sailia pea se manatu mai pulega e faatatau i lenei mataupu. O le pepa o faasalalauga faalauaitele mai le Transworld Distribution e pei ona lipotia ai e le leitio faavaomalo a Niu Sila ma le Talamuaonline o loo faaalia ai e le kamupani, o nai masina e lei mamao tele atu, sa sailiili atu ai i se fautuaga faaletulafono e faasino i le mataupu.
O loo ta‘ua o le faletelevise i Niu Sila o le TVNZ na tusi atu i le TV3 ma logo i ai e taofi le faasalalauina o nisi o ata e pei o le Dynamo, Magician Impossible lea e faapea na aumai faagaoi mai le TVNZ ma faasalalau ai e lea faletelevise.
Ua fai si umi o faia e ia faletelevise le faasalalau faasolitulafono o ni polokalame e leai ni laisene ma ni faatagana e faia ai e pei ona faaalia e le kamupani i Amerika. Ua ta‘ua foi e le kamupani ua tele mau ua oo atu e lagolago ai lea tulaga.
O se tasi foi lenei o mataupu sa laga i ni tausaga ua mavae e nisi o faletelevise i le atunuu sa latou tuua‘ia ai faletifaga ma falevideo i lo latou faatau o ata tifaga e lei oo i le taimi faaletulafono latou te faia ai lea gaioiga.
O le taiala o faasalalauga i Samoa ua aiaia ai taimi e muamua faaali ai se ata tifaga i se faletifaga, sosoo ai ma le faasalalau e se faletelevise ae mulimuli i le faletifaga. O se tasi o faletelevise i Samoa le EFKS TV o loo iai le aiā faaletulafono e faasalalau ai nisi o ata tifaga ma polokalame sa faasalalau e le TV1 ma le TV3 lea ua mafua ai ona tulai mai le mataupu.
O le faletelevise fou lea a le Ekalesia Faapotopotoga Kerisiano Samoa sa tatala ana fasalalauga i le masina o Iuni o le tausaga nei lea o loo pulea e le afioga Tuiasau Leota Uelese Petaia.
