O le taamilosaga o le Cedar for Christ, pe a faasamoaina, o le “Malosi mo Keriso” ua vaaia ai se vaaiga matagofie i le mafai lea ona tapuai faatasi auauna a le Atua ma ekalesia e eseese uma o latou igoa ma o latou faamalumaluga, i sauniga o le tatalaina o taaloga, ae faapea foi le toe tapunia i Aso Sa e tufa ai faailoga.
E faatāua i le anavatau o nei taaloga se faaupuga faapea, “e mafai ona tatou fauina faatasi le malo o Keriso i le lalolagi.”
E ui ina fai mai le tiapolo ma isi tagata ma isi faifeau e lē mafai, ae o le mea moni, e matuai mafai pe afai tatou te maua le loto maualalo, ma usitai i fetalaiga a Iesu, “e iloa outou e le lalolagi uma o o‘u soo moni outou, pe a outou fealofani.”
Ua faaaogāina taaloga o se auala (channel) e faatino ai le faamoemoe, ona o le fiafia o tupulaga i taaloga. O le igoa, “Malosi mo Keriso”, o loo faatatau tonu i tupulaga talavou, ina ia faaaogā sa‘o o latou olaga ma le malosi e taaalo ai ma fai mea uma mo Keriso.
Na molimauina le vaaia ai i le Cedar for Christ i tausaga ua mavae, o nisi o tupulaga ua lauiloa nei i taaloga, e pei o Lelia Masaga (Chief), Lolagi Visinia (Auckland) Tom Iosefo (Manu Samoa), Tim Nanai (Chief).
Ua 5 tausaga talu ona amataina nei taaloga; e faia i le vaiaso muamua o tausaga taitasi, ma e 14 autalavou na auai ia Ianuari 2012. Ua iai le faamoemoe, o le a faataunuuina isi taaloga o le Cedar for Christ i le Aso Lua 1st, Aso Lulu 2nd, Aso Tofi 3rd, o Ianuari 2013 i le malae masani i Aorere Park i Mangere.
O taaloga faapitoa i lea vaiaso, o le a aofia ai le kilikiti, soka, voli polo, lakapi pa‘i, tosogamaea. O le susuga i le faafeagaiga, Ps Poni Fonoti o loo mafai ona faafesootaia mo nisi faamatalaga i lenei faamoemoe tāua mo tupulaga talavou, i le telefoni: 2750572.
