Tapena se Aufaipese Opera Pasefika i Sini

O le maoae o siufofoga mālie o tagatānuu o le Pasefika i Sini ma Ausetalia nei ua mafua ai se taumafaiga e tuufaatasia se aufaipese opela (opera) i Sini. O lenei aufaipese o le fuafua e pepese i le Fale Opela (Opera House) i ni valaaulia.
O le susuga a Robert O’Brien o se alo o Samoa ma Tuvalu o le faatonu o lenei polokalame. O loo galulue faatasi ma le Casula Powerhouse i Sini lea e galue ai se tasi o alo o Samoa, Tofa Lalau Leo Tanoi.
E silia ma le sefulu tausaga o galue le Faatonu o le aufaipese faapitoa lenei i pesepesega faa Opela i Niu Sila ma Ausetalia nei ma e silia ma le sefulu aufaipese faapolofesa ua ia tuufaatasia, aotauina i leo ma faailoa atu i Niu Sila ma Ausetalia atoa.
“O le eseesega lava o siufofoga o nai o tatou tagata Samoa ma le Pasefika ma atunuu papalagi o le tau lē aoina (natural) o tatou leo auā e soifua mai lava ua lelei. Pau lava le itu e moomia o le teuteuina ma faatonutonu e auala i faamalositino o le siufofoga.” O nisi iloga ua galulue faatasi ma le susuga ia Robert O’Brien e aofia ai Eddie Muliaumasealii (opera).
E ui ina tatala le avanoa (auditions) mo soo se tasi e agavaa mai le atu Polenisia, Maikolenisia ma Melanesia o loo nonofo i Sini nei na faatumulia le filifiliina o le aufaipese i le mamalu o sui mai Samoa i Sini. E tusa ma le 50 sui ua tapena mo aoaoga i pese faa-Opela mai Siamani, Farani, Italia, Sepania ma le faaperetania. O i latou na pasi o latou leo na usuina lava a latou pese e finagalo i ai ae uma saili e le faatonu ia Robert le maualuga e oo i ai o latou leo ma faaemo i ai ituaiga mānava i totonu ma le taofiga o le ea auā le isi nota maualuga e sosoo i le isi fuaiupu.
Na maofa i latou siufofoga mālie na iai i lea po i le  agavaa o le alii faatonu. “E masani lava ona ou iloa le vaega o lau pese e gata ai le maualuga o lo‘u leo ae o le po nei ua faailoa e Robert le auala e siisii atili ai le leo o le tagata,” o le maofa lea a le tamaitai e sefuluvalu tausaga ia Senealiifa.
Na taualuga le po muamua o aoga pese i le usuina o se pese Opela faa-Farani ‘Pierre Yesu’ e na o le fā laina ma e na o le sefulu minute na a‘o ai upu i le na o le faalogo lava ma pue e aunoa ma le faaaogāina o tusi nota ma upu.
E valu minute o tapena vaega e fā ae maua ma logo mālie e pei o se aufaipese ua loa ona tuufaatasi. “O le eseesega lena o leo o tagata Samoa ma papalagi o le faigofie o le a‘oina,” o se saunoaga lea a Robert O’Brien.
Sa faamanuiaina ai foi ma siufofoga o le susuga i le Faifeau EFKS ia Rev Namusua Mareko ma le faletua ia Ataata mai le EFKS i Camden.
“O se avanoa lē aumaua lenei ma e ofo le agaga o le matagofie o aoaoga e faataunuuina i totonu o lenei polokalame,” o se lagona lea o le faletua. Sa molimauina foi e le vasega o taitai o lenei aufaipese taualumaga o lenei filifiliga ma na saunoa le faipese o le EFKS i Fairfield ia Sone, “O se avanoa lelei mo soo se tasi ua leva na pese i aulotu ma nisi faatoa oo i avanoa faapenei auā e faaopoopoina ai lo latou silafia i o latou lava siufofoga.”
O nisi foi o valaaulia o le a pepese ai i le Opera House i Sini nei. E leai se totogi na auai ai sui i lenei aufaipese ae peitai o le a totogiina nei o latou pasese (flights) faletalimalo ma alauni i soo se setete e valaaulia mai ai.
O le a talimalo foi i le Malaga a le matagaluega a leoleo a Samoa o loo tapena e masii mai.