O le pitonuu o Salei‘a i Avao e tupito ai ni vai alia se lua o le isi i le itu i Sasa‘e ma le isi i le itu i Sisifo, e tuaoi ma le afioaga o Manase.
O nisi o tausaga e lei mamao tele i tua sa lofia ai Salei‘a i ni tafega mai ia vai ālia e lua poo streams.
Na malepe ai se vaega o le alatele ma motusia ai feoaiga a taavale. Ua fausia ai nei se alasima ma ua lē toe aliali mai ai ni faaletonu pe a tatafe ia ālia.
E lē mafai foi ona sao ni taavale i le vai sima o loo i le itu i Sasa‘e pe a tetele tafega e sau mai uta agai i le sami.
O le mafuaaga lea o se polokalame a le lala o Malo Aufaatasi o feagai ma polokalame tau atiina‘e mo le lelei o tagata le UNDP e faatatau i fesuiaiga o le tau (climate change) mo le pitonuu o Salei‘a.
O le autū la o le polokalame o le faatalatalanoa lea o tagata o le pitonuu i ni gaioiga ma ni tapenapenaga talafeagai pe a aafia le nuu i suiga o le tau i le lumanai. Ua fausia ai nei se pa maa i le itu i gauta ma totō ai laau ina ia ola ma avea ma toomaga o tagata pe a iai ni faaletonu e aafia ai lo latou soifuaga masani i suiga o le tau.
O tina ma tamaitai faapea le au tino i matutua o matai foi o Salei‘a sa auai i le polokalame. Faaalia e se suisooupu o le UNPD o se tulaga lelei tele le tali ane o le mamalu o le pitonuu auā ua maua ai o latou lagona faaalia i nisi sauniuniga talafeagai.
O nofoaga maualalalo lata i le sami ma aiga o loo alaala ma nonofo ai o le a pito aafia i suiga o le tau i le siitia o le sua sami. O le isi lea sini autū o tapenaga mo ni mala faalenatura e toe aafia ai Salei‘a pe a oo ina tetele tafega ma aafia ai nofoaga o nonofo ai tagata.
O Samoa le isi o atunuu o le Pasefika o loo lagolago tele i polokalame i suiga o le tau e pei ona sa auai se usugafono a le Malo i le fonotaga tele i le tausaga ua mavae sa usuia i Mexico sa soalaupule ai suiga o le tau.
Mo tagata o Salei‘a ua toe sauni i se isi polokalame faaauau a le UNDP auā le saga faaaupegaina i sauniuniga i ni mafatiaga e fetaiai ma le nuu i le lumanai ona o fesuiaiga o le tau.
