Sausaunoaga afioga ia Patele Felise Mikaele ma le mafutaga o le Divine Mercy itu Samoa

Sausaunoaga afioga ia Patele Felise Mikaele ma le mafutaga o le Divine Mercy itu Samoa

O le tausaga 2020 o lea ua fuafua ma faataoto o le a talimalo ai Samoa i le fonotaga tele a le Divine Mercy a le lalolagi atoa, ma o lenei faamoemoe e ao ai i matagaluega uma a le Ekalesia Katoliko i Samoa ona sauniuni ma tapenapena auā le faataunuuina atu o lenei fonotaga tele.

O le tausaga ma masina ua vave lona faitauina ae lē o nofo ai foi le minoi o le vae o le uati o loo alu pea i aso uma ma taimi uma.

O le ala lea o le fuafua mamao o le matagaluega a le Divine Mercy i Malololelei i lenei tausaga mo sana sailiga seleni, ona e iai le lagona o le matagaluega e lima vaivai matafale o le ekalesia.

Ma ua tatau ona fai se galuega e fesoasoani ai i matafale o le matagaluega i le tapenaga o lenei fono a’o lava le taimi.

Nisi o faletua sa iai i le laulau o le mafutaga i le po o le dinner a le Palisi mai Samoa Malololelei

Nisi o faletua sa iai i le laulau o le mafutaga i le po o le dinner a le Palisi mai Samoa Malololelei

O le faletua ia Joan Pereira Tau o le teuoloa lea a le ekalesia Malololelei i Samoa ma le faletua ia Evelyn Meredith, o laua ia na muai asaina mai se fesoasoani mo Niu Sila nei auā se sailiga seleni a le matagaluega, ma o lea na sau ai le laua malaga i le vaitaimi o le masina o Mati ma taunuu mai i nisi o le aiga o le faletua ia Evelyn le faletua ia Lusi Koro ma lona alii ia Faamatuainu Tofilau Semo Koro ma faatoa’i ai loa le manaoga o loo nofo ma i laua ona o le vaai alofa i le laua ekalesia i Samoa i le tapenaga o le fonotaga lea i le tausaga 2020.

O le matagaluega Divine Mercy Parish Malololelei e toasefululima matafale, ae e lē tutusa uma aiga i saogamea e fai, ma o le ala foi lea o le tulai ma saili ona o le vaai alofa i tagata lolotu.

Ina ua mae’a le feiloaiga a le afioga ia Faamatuainu ma lona faletua ia Lusi faapea le aumalaga toalua mai Samoa ma ua taoto ai i se taotoga filemu se polokalame e ao ona agai mai loa le matagaluega mai Samoa e faatinoina iinei. O le fuafuaga e tapena uma e le afioga ia Faamatuainu ma lona faletua faapea o laua aiga le hall ma nisi o meaai auā le fofoga taumafa ae o le aumalaga mai Samoa o latou e gafa ma le faatinoina o le polokalame o le po faapea ma nisi o taumafa Samoa e malaga mai ma latou auā le faataunuuina o le faamoemoe.

O le po la o le Aso Toonai ua mavae na faataunuuina ai loa ma le manuia le polokalame a le matagaluega Divine Mercy Parish mai Malololelei i le Community Hall i TeAtatu Peninsula, e ala lea i le latou Dinner sa faatauina ai latou laulau e 70 ae $75.00 i le tagata e toatasi.

Na maitauina i lea po le alofagia e le mamalu o le atunuu o le tauasa mamao mai o le matagaluega mai Samoa e pei ona malaga mai ai le afioga i le taitaifono ia Namulauulu Letasi Dr Esera, Tevaga Mataeliga faapea le aumalaga e toasefulufa auā se fesoasoani, ua lē gata i afioga i Patele ma tiakono o le ekalesia ae ua oo foi i aiga uo ma ē masani ua sagisagi fiafia atu e lafo se maa auā le Atua ma lana galuega.

O le susuga ia Tevaga Aleki Mataeliga sa fai ma fofoga o le po i le faasoasoaina o le polokalame. E maeu le tali valaau o tagata ma mafutaga faapea faalapotopotoga i totonu o ekalesia, auā sa molimauina le toatele o mafutaga sa auai e pei o le mafutaga a Malisi, SCOPA, mafutaga teine tuai o Saint Marys faapea foi le mafutaga a le Divine Mercy itu Samoa lea o loo ta’ita’i ai le afioga ia Patele Felise Mikaele.

O sausaunoaga faasamoa na tatalaina lea e le aiga o le Akiepikopo ia Lui Mataeliga, ona faasolo ane lea i le mafutaga Divine Mercy i Aukilani itu Samoa, na faailoa foi le alofa tulai o nisi o mafutaga a aoga sa auai e pei o Malisi faapea le mafutaga a teine tuai a St Marys ma isi mafutaga sa auai i lea afiafi, ae lei tuua ai siva Samoa a nisi o aiga sa tauala atu lea i nisi o le aumalaga mai Samoa.

O upu a le tusi e galulue faatasi mea uma e lelei ai i latou o ē alolofa i le Atua, ma o le auga foi lea o le po, ua galulue faatasi ekalesia ma mafutaga faapea aiga uo ma ē masani e saili faatasi le fesoasoani auā le matagaluega i Malololelei i Samoa.

O upu mulimuli o le po na tulai ai le afioga i le ta’ita’ifono o le matagaluega mai Samoa ia Namulauulu Letasi Dr Esera e momoli le loto faafetai i le paia o Samoa aemaise o auauna a le Atua sa mafuta atu ma nutimea manogi faatasi ma le aumalaga mai Samoa.

O le agaga faafetai foi o le taitaifono na faaleo lea mo le afioga ia Faamatuainu Tofilau ma lona faletua ia Lusi Koro faapea o laua aiga ona o le tapenaina ma le faatulagaina o lenei faamoemoe o lea ua faataunuuina ai ma le manuia, aemaise ai o le malupuipuia o polokalame o le po ona o alo ma fanau sa galulue faatasi auā le faamatagofieina o le faamoemoe.

E $51,525.00 le aao mafola o le atunuu sa tauaaoina e le matagaluega mai Samoa ma o se seleni tele lea ua maua auā le faamoemoe o le matagaluega Divine Mercy Parish i Malololelei.

O le afioga ia Faimalo Allen Stowers ma le kamupani a le Pacific Ezy Money Transfer, faapea le aloalii ia Galumalemana Tai Galumalemana ma le auaunaga a le G-Mana sa lagolagoina lenei faamoemoe.