O le aso 1 o Iuni e faamanatu ai le Tutoatasi i Samoa ua faapena foi ma Niu Sila nei i totonu o Aukilani ua faamanatu foi i le aso 1 o Iuni e pei ona masani ai. 

O lea ua faama’oti mai e le afioga i le Konesula o le malo o Samoa i Aukilani se polokalame puupuu i le faamanatuina o le Tutoatasi o Smaoa i le aso muamua lea o Iuni, le Aso Toonai o le vaiaso nei.

O le faigalotu o lea ua tapena i ai le mafutaga a faifeau soofaatasi i Aukilani e pei ona masani ai, ma o lea ua faailoa mai ai o le susuga i le faafeagaiga ia Rev Motu Matia o le a ia taitaiina le sauniga o le Sisigafu’a ma saunia se upu faalaeiau mai le Afioga Paia a le Atua. Ua saunia foi e le susuga i le faafeagaiga se aufaipese mai se ekalesia latou te lagiina viiga o le Atua i lea aso.

O polokalame o le aso e mae’a le sauniga lotu ona sosoo lea ma saunoaga filifilia. O le afioga i le Konesula ia Faolotoi Reupega Pogi o le a fai ma sui o le malo e fai se tala otooto e uiga i le Tutoatasi o le malo o Samoa, ae o le afioga i le Minisita o tataga atu motu o le Pasifika ia Aupito Su’a William Sio o le a fai ma sui o le malo o Niu Sila e saunoa i se saunoaga autū o galuega faipaaga a Niu Sila ma Samoa. 

O faafiafiaga ua tapena i ai le ausiva a le Tatau Manaia ma le Taupou Manaia. O loo iai tusi valaaulia ua saunia mo nisi o malo faaaloalogia ae o loo tatala lava le avanoa mo le lautele o le atunuu e agai atu ai e molimauina faatasi le Tutoatasi o Samoa i lenei tausaga.

Talu ai ona o le Aso Toonai foi lea o loo faamanatuina faatasi ai i Samoa ma Niu Sila nei le tutoatasi a Samoa, ma o le ala lea ua lē mafai ai ona auai mai se sui o le malo e molimauina le faamoemoe o le faamanatuina o le Sisigafu’a i Aukilani.  O le itula e 10 e amata ai le polokalame ae iai le faamoemoe e tatau ona ta ane le 12 ua mae’a polokalame o le aso. Ua na’o se taumafataga māmā o le a saunia i lea aso e tali ai le sua mo malo faaaloalogia faapea le lautele o le atunuu o le a auai ona tatala loa lea o le fili alii.