O le Konekarate o le South Pacific Cladding poo le SPC, na osi feagaiga ma le komiti o le aoga tulagalua a Faleasiu i pitonuu o Moamoa ma Tauoo e fausia le faleaoga fou i le fesoasoani tupe na maua mai i le Malo o Iapani.
E silia i le $300,000 le aofaiga o le fesoasoani ma o le ogatotonu o le tausaga nei 2015 na amata ai le galuega. I le tatalaina o le faleaoga fou i le vaiaso ua mavae sa vaaia le laumata fiafia o fanau ae faapea foi le sagisagi atu o mātua ma tagata o le nuu e faaulufale le galuega. Peitai o foliga o le fiafia o loo tanu ai i totonu lagona o le lē fiafia ma le faanoanoa ona o le amataga o le galuega na faaletonu ina ua toetoe lava uma le seleni na faimeaalofa atu ai Iapani ae na o le faavae o le faleaoga e pei ona faaalia e le taitaifono o le komiti le afioga Tuitama Dr Talalelei Tuitama, o ia foi o le faipule o Aana Alofi Numera 1.
Na faaalia e le taitaifono i lana saunoaga i le tala o le galuega ua lē ogatasi le futia ma le umele i fuafuaga a le komiti ma le konekarate. Na faaalia e Tuitama e tusa ma le $278,000 le tupe ua alu ae na o le faavae o le faleaoga ua fausia.
Sa totoe ai si selau afe ma ona tupu o le foai faameaalofa a le Malo o Iapani, ona tonu lea i le komiti e faamuta loa le mafutaga ma le SPC ae se‘i saili se isi auala e maua ai se fesoasoani e faaauau ai le galuega. Ua tuua‘ia e le komiti le konekarate a le SPC i le piopio ma le lē sa‘osa‘o aemaise o le pepelo ia latou tuugatala na malilie i ai mo le fausia o le faleaoga.
E ui ina sa‘i se finagalo o le taitaifono i le konekarate ae na auaufaatasi pitonuu o Moamoa ma Tauoo e saili loa se isi auala lea na maua ai se aitalafu mai le kamupani o le Bluebird. Na vivii e le taitaifono o le komiti le agalelei o lea kamupani na mafai ona faatino ai le vaega atoa o le galuega. O nisi o oloa e lei maua i le Bluebird na faatau mai isi kamupani ona ua tuai ona taunuu oloa a le Bluebird ae ua fia faatelevave le fausiaina o le faleaoga.
E silia foi i le 250 afe le tupe na toe faaauau ai le galuega lea na maua ai le tuu aofaiga atoa o le tau o le faleaoga e silia i le ‘afa miliona poo le lima selau afe tala Samoa. Ua faaalia e le komiti a le aoga ua nofo sauni e tuuina atu i le faamasinoga se latou tagi faasaga i le konekarate o le South Pacific Cladding ona o le faaletonu na tulai mai, aemaise lava o le lē tausisia o maliega na faia.
E lei maua se avanoa e fesiligia ai le afioga Tupuola Patrick Boon o ia lea e pulea ma umia le konekarate. O le SPC foi na faia le galuega o le maota o le Ioane Viliamu a le ekalesia EFKS lea na faamuta e le ekalesia ona o ni faaletonu na feeseeseai ai le pulega o le ekalesia ma le konekarate. E momotu le mafutaga a le EFKS ma le konekarate o le SPC e lei mae‘a uma vaega o le galuega na toe faapipii ai se ituaiga o apa anagata i le tino atoa o le maota o le Ioane Viliamu i Tamaligi i Apia.
