O le alo atu o Brisbane e faamanatu le tutoatasi o Samoa i lenei aai, o lea na faataunuuina ai se faafiafiaga tele sa faatautaia e le Mafutaga a le Samoa Tuufaatasi i Kuiniselani. O le mafutaga lea o loo tuufaatasi i ai nisi o taitai o isi mafutaga ma ua oo mai i ai le faasologa mo le faataunuuina lea o le faamanatuina o le Tutoatasi o lenei tausaga 2014.
O le Peresetene o le Samoa Tuufaatasi, o loo faauluulu i le afioga ia Lemalu Taulapapa Roy Slade. Sui o le tofa ia Faimalotoa Ioane Pale ua faafoeina le mafutaga tuufaatasi lenei. O le failautusi o le tofa ia Leautuliilagi Malaeoalii Vaa Leapai. O le afioga ia Muliagatele Filipina Petelo o ia lea o le teuoloa.
Ua alo atu nei e faamanatuina lea aso faapitoa i le 8 ma le aso 9 o Iuni o le tausaga nei. Tele tapenaga matagofie mo lea faamoemoe ua tauau ina tino mai ae o le seleni lava le ki e faataunuu ai fuafuaga uma e pei ona iai le siva i le po o le Aso Toonai, 26 o Aperila.
O le failautusi lava ia Leautuliilagi Malaeoalii Sogialofa Vaa Leapai sa fai ma fofoga o le aso, ma sa toatele i latou sa auai ma fiafia i le mālie o musika a le UBEC Boys.
