Speak, Talk to me in your Gagana O le autū lea, o le a taulai i ai finagalo ma tapenaga uma ua faamoemoe i ai le faalapotopotoga a le Sosaiete Aoga Amata i Aotearoa mo lana fonotaga tele o lenei tausaga. O le fono a le SAASIA, o le a faia lea i Aukilani e pei ona faamoemoe i ai i le masina fou, Iulai aso 15, ma le 16.
O se feiloaiga ma le afioga i le Peresitene, Sala Faasaulala Tagolilelagi Leota, sa ia faaalia ai le telē o se tāua o le fonotaga o lenei tausaga.
Aemaise lava o le autū e pei ona filifilia e taulai i ai finagalo ma manatu o sui uma o le faalapotopotoga i Niu Sila, ma fafo atu.
Na faailoa foi e Sala e faapea, o le fono foi lenei o le a mafai ona auai mai ai le sui mai Hawaii. O le a telē se avanoa e mafai ona fetufaai, ma silafia ai foi e Hawaii le gasologa o le galuega o loo taumafai i ai i totonu o Niu Sila. Ae lē gata i lea, o le a maua ai foi se avanoa e faalogologo ai pe o faapefea le galuega i lea foi atunuu.
E tele sui faapitoa ua mae‘a ona tapenaina a latou saunoaga autū mo le fonotaga.
O nisi o tamalii, ma Polofesa o le atunuu, faapea foi tamafanau iloga i totonu o le galuega faafaiaoga, o le a folasia a latou pepa ma folasaga e faatatau lava i le autū i aso e lua o le a faagasolo ai le fonotaga.
Saunoa Sala, e iai le talitonuga mo ia a aso e lua e pei ona faamoemoe i ai le SAASIA i lana fonotaga, o se aso o saunoaga ma fetufaaiga ma faasoa o le a fesoasoani tele mo le agai i luma o le faalapotopotoga ma ana galuega fai.
O le polokalame faataoto mo aso e lua ua mae‘a foi ona tufatufaina ma faasoasoa i sui uma ua mae‘a ona lesitalaina mo le fono o lenei tausaga, atoa ai ma malo faaaloalogia o le a saunoa faapitoa mo lea aso.
O le SAASIA, ua atoa le 20 tausaga talu ona amata ma fofoa mai, i lona sini ma lona autū ia tuufaatasi ai faiaoga o Aoga Amata Samoa uma, e fetufaai ai finagalo mo le saga faaleleia atili o le galuega faafaiaoga. E lē gata mo le lelei o le faiaoga lava ia, ae ia sili ai ona aogā ma manuia ai le ola atia‘e o fanau e pei ona faaautu i ai Aoga Amata.
Ia lē gata mo le manuia o faiaoga ma fanau aoga i totonu o Aoga Amata, ae faapea foi le tāua mo mātua ina ia malamalama lelei, ma faatāua Aoga Amata.
I le tulaga o fesootaiga ma le galulue faatasi i soo se vaega mo atina‘e eseese a o lona auga lava ia penefiti fanau ma ia siitia pea le tulaga o le a‘oa‘oina o le gagana Samoa i Aoga Amata.
O sui o le laulau a fono o loo tulai i le taimi nei mo le faatautaia o lana fonotaga o le 2011. O le Peresitene, o le Afioga Sala Faasaulala Tagoilelagi Leota, o Tulimalefasi Isabella Tanielu-Dick o le Failautusi, ma Sofaea Penn o le Teutupe.
O nisi o sui sinia o le komiti, o le afioga Leautuliilagi Sauvao, Elisapeta Vili, Mere Autagavaia, Ruta McKenzie, Fou Alapati, Savaliga Liko, ma Lupe Vaueli.
O faatina o le faalapotoptoga, o Fereni Ete ma Iolesina Tagoilelagi.
O le nofoaga o le Iunivesite o Matata Eseese i Manukau, AUT Campus MD Building, 640 Great Souith Road Manukau, o le a usuia ai le fonotaga tele e pei ona loma nei.
O le aso 15 ma le aso 16 o Iulai ua faatulagaina, ma o loo avanoa pea pepa lesitala mo sui uma, faapea foi ni sui fou e fia ulufale i le faalapotoptoga, i luga o le tuatusi www.saasia.org.nz.
