Tui Atua Tupua Tamasese Efi

Tui Atua Tupua Tamasese Efi

Ole agaga ole fiafia ma le agaga ole faafetai ile afioga ile Tui Atua Tupua Tamasese Efi ma le masiofo ia Filifilia Tamasese, faatasi ai ma le Aiga Sa Ta’isi, faapea le faalapotopotoga ole Gaualofa Foundation, ile sauni atu lea ile faalauiloaina poo le tatalaina aloaia lea ole tusi ua faaigoaina ole “Tautai” – Samoa World History, and the Life of Ta’isi O.F. Nelson, na tusia ele tamaitai Ausetalia ia Dr. Patricia O’Brien.

Ole Aso Tofi ole vaiaso nei 24 o Aokuso o lea ua fuafua e faataunuuina ai lea faamoemoe ile maota i Malaeola ile 16 Waokauri Place i Magale ile 5.30 ile afiafi. Ole po foi lea ole a faafofoga iai i nisi o malo ua filifilia e molimau ile tatalaina ole tusi, e pei ole afioga ile Tui Atua Tupua Tamasese Efi Ta’isi, Dr. Patricia O’Brien, Rt. Hon. Helen Clark, Laauli Sir Michael Jones, Toesulusulu Associate Professor Damon Salesa faapea Brian Morris ole sui faapitoa ole Huia Publishers. I totonu o lenei lomiga ole Samoa Times oloo faailoa atu ai le tele o nisi o faamatalaga e uiga i lea faamoemoe ile ulufale faapea ma le nofoaga oloo faatauina ai lea tusi pe a mae’a ona tatalaina.

Ole tusi ole “Tautai”, ose molimau ile agavaa ma le sao o Ta’isi O.F. Nelson, ole tuaa tamā ole tina ole afioga ile Tui Atua. Ole “Tautai” ole talafaasolopito ose tasi mai ile tulu’iga ole malo tele o Peretania na ia fou ma tetee ile a’uga ole faigamalo.

O lenei tusi oloo faamatala auiliili mai ai le olaga o Ta’isi oloo ua faaigoaina ole nifo tulimanu o Niu Sila ma le aoao tetele o pulega malo a Peretania.

Mai faamaumauga o pepa faapea ai ma faatalatalanoaga, ua avanoa ai Patricia O’Brien e faamatala auiliili le olaga o Ta’isi ma toatuga sa feagai ma ia. Mai lenei tusi ile olaga o Ta’isi, ua tele ai foi le avanoa ua maua ele aufaitau ma le mamalu ole atunuu latou te malamalama ai ile sailigamalo ole Mau.

Ole uluai tusi lenei ia Ta’isi O.F. Nelson, ose molimau ‘anoa ma le tāua, e le gata mo tagatanuu ae faapea ai ma le lalolagi. Oloo aofia ai le talafaasolopito o malo ma atunuu ole lalolagi, ae le gata i lea oloo aofia ai foi talafaasolopito ma mau eseese e faaosofia ai ia faatalatalanoaga ma ni finauga mai le seneturi e luasefulu seia oo mai ile taimi nei.

Moimau ile Tusi

Fai mai Maualaivao Albert Wendt: Ile lavelave ma le gaogaosa ole pulega faakolone a Siamani na sosoo ai ma Niu Sila, e matilatila le tulai mai o Ta’isi O.F. Nelson ose tasi e tamaoaiga i mafaufauga toe loto tele, ma ose tagata foi e tinou ma lotomau i lana finau ina ia maua mai le malo Tutoatasi o Samoa.

Ae fai mai Alison Bashford ole Iunivesite o Cambridge i Peretania, mai se tautua ma se olaga iloga, ua avanoa ai ona faamatala e Patricia O’Brien se molimau ‘anoa ise lalolagi oloo fesopoai.

I lana tusi ia Ta’isi ua avanoa ai foi ona ia sosoo ia malo tetele tāua, ile faasoaina ole malosi o tau tupe, ose faatautee i pulega faakolone, ma se tupuaga e fesootai ma felagolagomai ai malo ile 60 tausaga. E maeu le loloto ole suesuega o lenei tusi, ua le gata ose talafaasolopito o Samoa, ae ose talafaasolopito foi ole Pasefika ile tau amataina ole senituri 20.

Faamatalaga ile tamaitai Tusitala

O Dr Patricia O’Brien oloo ia umia se faailoga ile matata ole talafaasolopito ile Iunivesite o Ausetalia ANU. Ile tausaga 2012 sa na ia umia ai le Stout Fellow ile Iunivesite o Vitoria i Ueligitone i Niu Sila. Sa avea foi o ia ose polofesa lagolago ile matata ole Talafaasolopito ile Edmund A. Walsh School of Foreign Service, Georgetown University, Washington DC, US.

Faamatalaga ile Gaualofa Foundation

Ole Gaualofa Foundation, ua avea lea ma se galuega tau atiae ale afioga ia Tui Atua Tupua Tamasese ma le masiofo ia Filifilia Tamsese. Ole a faaauau ai le la tautua ia Samoa ma fanau ale Pasefika.

Ole faamoemoe ole Foundation, ina ia faaolaola ma faaauauina le mau faavae, a o tatou mātua, e le gata i aoga, ae faapea ai i soo se faiva o mafaufauga poo alofilima faapea ai ma gagana, talafaasolopito, tu ma aga a tagata Pasifika. Faapea ai ma se faasinoala ise tofa ma se faautaga lelei, atoa ai ma ni ala e puipuimalu ai lo tatou siosiomaga.

Ole a taumafai foi e atinae sikolasipi ma ni avanoa e maua ai aoga i fafo, ile aoaoina ma le faalauteleina ole mau tusitusia ma le mau tautala, ole mau o lauga ma tu ma aga. 

Ole faamoemoe ole Foundation, ia ave le faamuamua i fanau talavou, i mātua, i tagata matutua ole Pasefika ina ia avanoa ai ona faamalosia aiga ma nuu.

Ole Foundation oloo faafoe ele Gaualofa Trust, ile komiti faatonu oloo auai Maualaivao Albert Wendt ma isi.