Ua lē ma le mativa, ma ua lima vaivai le afioga ia Patele Fati ma le PTA a mātua o le aoga a Pope Paulo VI i Leulumoega ua mafua ai ona latou savalia ala o le mativa i totonu o Aotearoa ma faatagisia le fesoasoani a tama ma teine tuai o le aoga poo i latou sa a’otauina i totonu o lenei Kolisi i Samoa lea ua aumau nei i totonu o Aotearoa, i sina seleni se’i fesoasoani ai i le toe faaleleia o faleaoga o loo aoaoina ai fanau aoga auā lo latou lumanai manuia aemaise o le tapenaga a le Kolisi i le faamanatuina o lona 50 tausaga talu ona faavae mai lea ua fuafua e faamanatuina i le tausaga 2020.
O le faatalauula mai o le afioga ia Patele Fati ma le PTA i Samoa i se fesoasoani, na talisapaia ai e le afioga ia Patele Michael Alipia ma le kulupu o le Mother of Divine Mercy Youth Group faapea le faatina ia Susana o le a savali faatasi ai ma le tamaitai ia Rita Ocallaghan. Ma o lea sa latou tapenaina ai loa se posiva auā lenei faamoemoe.
O le Aso Toonai ua mavae, aso 19 o Me na faataunuuina ai loa lea faamoemoe i le hall a le ekalesia Katoliko St John Vianney Parish i Hillsborough.
O le afioga ia Patele Michael Alipia na taitaiina le polokalame i le sauniga lotu, ao le tamaitai ia Rita Ocallaghan sa fai ma fofoga o le aso.
O le peresetene o le PTA o le aoga mai Samoa le fetalaiga ia Lio sa fai ma fofoga faafeiloai o le taeao i le paia ma le mamalu o le auvalaaulia, ona tatala aloaia loa lea o ipu i le sausaunoaga a le afioga ia Patele Michael Alipia ma faagasolo ai i ipu a aiga uo ma ē masani aemaise o nisi o sui o ekalesia mai Malaeola sa faapea ona auai atu ai e limalima faatasi le sailiga seleni a le aoga mai Samoa.
Na maualuga ma matagofie le faamoemoe ona sa faatasi atu iai le afioga i le Konesula o Samoa ia Faolotoi Reupena Pogi, o le Minisita o tagata atumotu o le Pasefika ia Aupito Su’a William Sio, o le afioga i le taitaifono o Malaeola ia Afomua, faapea faauluuluga o nisi o kamupani o alo ma tama fanau o Samoa.
O le afioga ia Patele Fati na taualugaina sausaunoaga o le aso, ma faaiu ai loa i le tolaulauina o le maau ma le milomilosia o le atunuu. O le fetalaiga ia Lio sa fai ma fofoga mulimuli o le aso i le taimi o faaaloaloga, lea na tatala ai le malo aua le talimasineia o le aao mafola o le paia o Samoa potopoto sa auai.
E 23,000.00 le maau o le atunuu sa tauaaoina e le mafutaga a Pope Paulo VI, ma sa momoli ai le agaga faafetai o le afioga ia Patele Fati sa fai ma sui o le aumalaga e toalima mai Samoa aemaise i latou sa tapenaina le faamoemoe sa maualuga ma matagofie ia le aso, tainane o le paia ma le mamalu o Samoa potopoto sa mafai ona auai atu e tausoa faatasi le avega i le sailiga seleni.
Ae o le faafetai faapitoa i le afioga i le Konesula o Samoa ia Faolotoi Reupena Pogi faapea le Minisita ia Hon Aupito Su’a William Sio, o le ofisa o Malaeola faapea le afioga ia Galumalemana Tai Galumalemana ma lana auauanaga o le G-Mana i le lagolagoina o lenei faamoemoe, e ala i faasalalauga, faapea foi le afioga ia Faimalo Aleni Stowers ma le Pacific Eazy Money.
Faafetaia foi i le susuga ia Walter i lana faaili sa faapea ona ofo fua atu e faatinoina ai lenei faamoemoe auā o se tasi o alo o le tina ia Lusia o loo auai i totonu o le mafutaga. E iai le faamoemoe o le aumalaga mai Samoa e mae’a le sailiga seleni i Aukilani ona toe tuuvaa atu lea i Melepone e faaauau ai le sailiga auā le faamoemoe o le Kolisi o loo loma nei.
