O aso o le ‘ata ma le tagi, o aso foi o le fiafia ma le faanoanoa, peitai o la le Tusi Sa, “Amuia e ua oti, o e ua oti o i le Alii!” “Amuia foi e faanoanoa, auā e faamafanafanaina i latou.”
Pagā se tina foi ina ‘a lototele ma alofa.
A o lei muta le soifua o le tina talavou ia Faapale Salani Faagase i luga o lenei fogaeleele, na ia fuafuaina uma le faagasologa o lona aso poo ona toe sauniga uma e faamavae ai ma ona aiga pele, uo ma ē masani faapea si ona toalua ma sia la fanau. O le tele o tonu o lona aso na ia iloa uma a o lei to lana mānava.
O le toe 10 minute i le 10 i le po o le Aso Toonai, aso 6 o Oketopa, na faamanavaina ai e le Atua galuega a le tina talavou ia Faapale Salani Faagase, a o loma le faamanatuina o le 42 tausaga o lona soifua i le aso 10 o Oketopa. O se tasi o uso e faagalogata i ona uiga tausasdafia, loto alofa ma agalelei i le tele o tagata, ma ua misia e le toatele e pei ona faatumulia ai ona toe sauniga ma vaaia ai le tele o le loifofoga maligi. E 6 vaiaso na faataotolia ai le faletua i lona gasegase o le kanesa a o faapea ona tausi pea i ai si ona alii ia Bob Faagase ma le nofoaalo, o tama uma e to‘a 4. Ina ua sauni Faapale Salani Faagase mo lana malaga, sa ave lona manaoga i si ona toalua ma si a la fanau e tatau ona faatau lo latou fale o loo nonofo ai ae toe sifi i se isi foi fale fou, ma na faapea lava ona faia e le tamā ia Bob ma le nofoaalo manaoga uma o lē sa pele i o latou loto. Sa tele ina asia e aiga ma talanoa i ai ae tasi lava lana tali o ia ua sauni i lana malaga.
Se vaaiga ina a faamomoiloto i le lauē o aiga aemaise nai tamaiti ma si ona toalua a o tuutuu ifo i lalo le pusa maliu o le tina ia Faapale. E oo foi isi ona tina ia Asofa Fetulia‘iga (Paia i Savaii) sa lei matu loifofoga i le motusia o mafutaga māfana ma si ana tama e ui ua leva na fai i lagi le folauga a le tamā ia Leuta Fetulia‘iga.
O tuaa o le susuga ia Bob o le tamā ia Sefuluai Seua‘i Faagase ua malolo i tiasā ma le tina ia Penina Faagase o loo soifua pea (Tuanai), ua matuai misia lava lea mafutaga ua motusia. Na faia ona toe sauniga i le Aso Faraile, 12 o Oketopa i le malumalu o le Ekalesia a Iesu Keriso O le Au-Paia O Aso E Gata Ai i Karawatha ma ua lagomau nei i le fanua maliu i Beenleigh.
O le susuga ia Bishop Otineru Tofa na taitaia le sauniga, ae Pule Faamalumalu, Susuga Epikopo mai Eight Miles Plain, susuga ia Bishop Francis Ivā. O talosaga sa molia e le Susuga Jacob Matua‘uto faapea si ona uncle ia Atinae Fafai.
Na faaiu i se taumafataga tele na saunia e le Faleaiga lauiloa Uncle Sam’s Catering (Poulava Sam ma Lona Matautia).
O le Susuga Tusitala Taupau sa fai ma fofoga o le aso, e faafetaia aiga na lua na saunia e lona uncle malaga mai Samoa i Paia le tama ia Mau‘ai. Na tapu uma tulaga o le aganuu, ae ua na o se agaga faafetai sa saunoa i ai le susuga ia Ianusi mai le Uarota o Marsden e faafetaia ai aiga ga lua i nisi o vaega tāua o le aso.
Tau ina ia iai pea faamafanafanaga a le Atua i aiga loto faavauvau.
