Ua faalauiloa faalauaitele nei le au lakapi a tamaitai, a le Afa a Aukilani poo le Aukland Storm, e tapena ma sauni atu ai mo le taamilosaga o le Ipu a le Air NZ o lenei tausaga.
O le au a Aukilani ua faalauiloa mai nei, e le gata o le au filifilia mo le taamilosaga o le 2009, ae o le au foi lea o le a taumafai e puipuia le siamupini o loo umia i le taimi nei, mai tausaga ua mavae.
O le au lakapi a Aukilani o loo matua lagolago malosi e le kalapu a Malisi lea sa manumalo i le la taaloga ma College Rifle, i le faaiuga o le vaiaso na tea nei, i le sailia o le siamupuni i le va o kalapu i Aukilani nei.
O le tamaitai o Ana Richards o se tasi o maatulimanu o le aulakapi a Niu Sila, le Black Fern, ua le mafai ona filifilia i le au mo lenei tausaga.
O le au a le Auckland Storm ua faapea foi ona toe filifilia ai le tamaitai sa avea muamua ma faiaoga o le au lakapi a le Black Fern, faapea le Manu Sina, le au a Samoa. O Davida White ua filifilia nei ma faiaoga, sa ia faiaogaina le au tele a Niu Sila, atoa ai ma le au lakapi a Samoa i le taamilosaga o le ipu o le lalolagi i le tausaga talu ai.
Ua filifilia Dave Nofoa e lagolago ia Davida, poo le faiaoga lagolago foi lea o le Storm mo le 2009.
E toaono tamaitai Samoa o loo filifilia i le au a le Storm, ma o i latou foi o ni sui taaalo o le au faavaomalo a le atunuu, le Manu Sina.
E aofia ai Bella Milo o Malisi, Ala Leavasa o le kalapu a Manukau Rovers, faatasi ai ma Linda Itunu o Ponsonby. O le tamaitai o Fiaoo Faamausili, faapea le auuso o Justine ma Vania Lavea mai le kalapu a Malisi.
O nisi o tamaitai Samoa o loo iai pea le avanoa mo le au, peitai e le o atoatoa le malosi i le taimi nei e aofia ai le pou malosi (prop) o le Manu Sina, o Fionna Timoteo, o le kalapu a College Rifles o loo iai i maitaga o tina mo le taimi muamua.
O Ese Sao-Taliu o le kalapu a Otahuhu faatoa toe taliu mai i le taaloga, i le maea ai ona faamanuiaina i le meaalofa a le Atua mo lona taimi muamua foi, a o Faanati Aniseko o Ponsonby lea foi faatoa toe taliu mai i le taaloga ona o ni manuaga sa aafia ai.
Ua faamaonia mai o le a amataina le taamilosaga a le Storm 2009, i lana taaloga muamua o le a feiloai ai ma le au a Manawatu i le aso 22 o le masina nei o Aukuso. O lea taaloga o le a fataunuuina lea i le malae poo le nofoaga i Western Spring Stadium.
O loo faapea foi ona vaaia le tulai mai o le toatele o nisi alo tamaitai Samoa mai le tele o isi au faaitumalo o lenei lava taamilosaga, e pei o le au a Uellingtone , Hawkes Bay ma Otago.
O le au a Uellingtone Pride, o Bridget Smith, o le kalapu a (Stokes Valley RFC), o Maryan Collins (Petone RFC), Tuila Waterhouse ma Rebecca Liuaa, o (Oriental Rongotai) o Sanita Levave ma Jess Saolele, (Nothern United) o Tatiana Tafatu ma Trudy Lagolago, Serena Curtis-Lemuelu e mai le kalapu a (Johnsonville RFC).
O le tamaitai o Sene Fanene o loo filifilia mai le au a Hawkes Bay a o Victoria Nafatali mai le au faaitumalo a Otago. Ua molimauina foi o loo iai nisi tamaitai Samoa o loo ua filifilia mai le au faaitumalo a Canterbury, peitai e oo mai i le taimi o lenei lipoti tusitusia, e lei toe faamautuina mai, pe faailoaina mai suafa o i latou ia.
