E fasefulu ma le tasi le aumalaga a le aoga o le Kolisi i Saute ua tapena atu nei mo lana malaga taamilo i Samoa i le amataga o le masina o Iulai. O lea aumalaga e aofia ai faiaoga e toasefulu ma tamaiti aoga e tolusefulu ma le tasi.
O le faamoemoe o lenei ‘au e pei ona o le a malaga atu ai i le atunuu, o le faamalamalama atili o le iloa i le tu ma le aganuu a Samoa e pei ona iai. O lenei polokalame ua leva ona fuafuaina e le susuga ia Lala Tuua ma nisi o alo o le atunuu o loo galulue ai i totonu o lenei aoga faatasi ai ma le lagolago a mātua.
O le aso 3 o Iulai ua fuafua e alu ai le malaga ma e lua vaiaso le umi. O sailiga tupe a le fanau i le aoga o loo mafai ona faatinoina ai pasese.
O le afioaga o Manono o le a taunuu i ai le malaga ma nonofo ai i po e lua ona malaga lea i Tafatafa ma api ai foi i isi po e lua, ma faaiu ai i le motu i Salafai i le vaiaso atoa.
O le afiafi o le Aso Faraile, 27 o Iuni na faataunuuina ai se koneseti tele a lea aumalaga i le hall a le kolisi i Magele. Na tumutumu lea nofoaga i mātua ma fanau na agai atu e maimoa ma lagolago le sailiga seleni a nei alo o le atunuu auā le latou faamoemoe e pei ona fuafuaina.
Na vaaia le naunau atu o mātua ma totogi uma latou ticket e faailoa ai lo latou titi faitama i fanau aoga. O le afioga ia Peseta Savea Al Harriton Lavea sa fai ma fofoga o le po, a o le susuga i le faafeagaiga ia Rev Vosalevu Finai sa saunia le tatalo e amata ai le polokalame.
Na sosoo ma le pese na usuina lava e le aufaipese a alo ma fanau i totonu o le aoga, faapea foi ma le latou siva Samoa e faatatau i le ava.
E tele ni siva, pese ma sasa na saunia e le kulupu Samoa i le latou koneseti, faatasi ai ma faafiafiaga a nisi o autalavou e pei o le New Vision Church Youth, o alo mai Tonga, Cook Island, ma le ausiva o le La o Samoa Dance Group faapea le aufaafiafia a le Happy Hour Dance Crew.
Na faatauina ai foi meaai i lea po i le sailiga seleni a le fanau ona o le taumafai lava ia lava saunia tapenapenaga a le fanau i le latou faamoemoe.
