Ua sauni nei le tamalii o le atunuu ua iloga ana fatuga i musika faaonaponei le afioga ia Lealaitagomoa Asuao Felise Mikaele e tatala aloaia lana CD Volume 27 ua faaigoaina o le “Come Onto Savaii” faatasi ai ma lana DVD o le “Fa‘ailo o le Fa‘aolataga.”
O lenei faamoemoe o le a faataunuuina i le fale faafiafia o le R8 Club i totonu o le taulaga faatau a Magele, lea sa ta‘ua muamua o le Apia Way, i le po o le Aso Faraile aso 25 o Aperila, le aso malolo o le ANZAC, mai le 7 i le afiafi e oo i le 2.30 i le vaveao.
O le ata (DVD) e 13 ata ua mafai ona tuufaatasi i totonu, ma sa pueina i San Pedro i Los Angeles ma Samoa i luga a‘e o Vaoala i le mauga ua igoa o “Malolo Lelei”, ma sa faaaogā ai Visual Effects i tekenolosi faaonaponei.
Sa tatalaina lenei ata i Canberra i Ausetalia, ma na ta‘ua e Asuao, e 500 ata sa mafai ona faatauina i totonu o le 1 le itula.
O le pese “Fa‘ailo o le Fa‘aolataga” ua leva ona faaaogā e Ekalesia Samoa i soo se atunuu. Afai e oti se tagata e ta feto‘ito‘i le logo e faailo ai ua maliu se tasi, ae o le maliu o le Faaola o le lalolagi, o Iesu Keriso, o le pa‘ō o le samala sa tutu‘i ai fao ia mau lelei lona tino i le satauro, o le faailo lena o lona maliu, o le tatagi o le samala i le tau i le fao, ae lē o se logo sa ta feto‘ito‘i.
O loo iai ma le ata o le pese ua faaigoa ai lana CD 26, “Taimi Faigata mo A‘u”. O le tala i se alii sikolasipi Samoa sa a‘oa‘oina i le Iunivesete o Victoria i Ueligitone. Ina ua uma lana aoga ona toe foi lea i Samoa i le tausaga 1972 ae tuua se tamaitai palagi sa la feoai mo le fā tausaga, faatasi ai ma isi ata o ana koneseti i le 2013.
O le CD 27 ua na o pese fou e 10 o loo iai i totonu aemaise le pese ua faaigoaina ai le kaseti, “Come Onto Savaii” poo le “Afio mai i Savaii” ma se tasi o pese mo le Aso Sa o Tina, o le “Alofa faatina.” O loo iai ma se pese o loo fiafia foi i ai le mamalu o le atunuu i Ueligitone ma Amerika ma Tutuila ua oo i ai le CD, o le “Susua Moegaluaga,” “E Sili Samoa mo Tamaloloa,” “E Seki a Samoa”, ma isi pese vave faaneionapo e faalalo ai le toto maualuga ma le suka.
O le po o lana faafiafiaga, Aso Faraile, 25 Aperila, e $20 le ulufale mo i latou uma o le a auai e lagolago le faamoemoe, ae o le a maua fua ai le DVD fou poo le CD fou. Ae o i latou o le a ulufale i le 7pm e oo i le 9pm e toe maua le isi DVD o le “Tama a Samoa Special”, e faamanatu ai le tamalii iloga o Samoa i le lakapi ua fai i lagi le folauga, o Papaliitele Pita Fatialofa.
Na ta‘ua e le fatupese o lenei tapenaga e na o le tasi le tausaga na ia saunia ai le DVD ma le CD, ma lona faamoemoe o le a toe fuafua le isi ata ma le CD pe a oo i le tausaga fou.
O le afioga ia Lealaitagomoa Asuao Felise Mikaele ua 63 tausaga o lona soifua, ae o loo mālie pea ana fatuga i le faafofoga a le atunuu.
Ua 35 tausaga talu ona ia faaaogāina lana meaalofa ua foai mai e le Atua, o lana taleni foi ua fealuai ai ma lauiloa i le tele o atunuu o le lalolagi, ae o loo aumau nei i Ueligitone ma le aiga. O ona afioaga i Samoa, o Siumu, Vailoa Palauli, Siufaga Falelatai, Manono ma Vaiee.
