“E tāua le saili o faapogai o faitioga e faaleleia ai ni faaletonu”…Leausa Dr Take Naseri
O mataupu ua oo i le faamasinoga ona o ni tagi faasaga i ni tuua‘iga o faaletonu i le auaunaga faalesoifua maloloina. O tuua‘iga foi e faaleo i auala o faasalalauga e pei o nusipepa, TV ma leitio ae o fesootaiga televavave faaonapo nei, o le pogai lea o le agai o le matagaluega o le soifua maloloina e fausia se faiga faavae e suesue ai ni faaseā ma ni faitioga.
“E lē natia ua tele faitioga ua aliali mai aemaise o nusipepa o loo sasa pala mai ai faitioga i le soifua maloloina ma e tāua tele faitioga pe a suesue lelei le mafuaaga”.
O se finagalo lea o le Faatonu Sili Aoao o le Matagaluega le alii fomai le tofa Leausa poo le afioga Toleafoa Dr Take Naseri ina ua fesiligia i le tatalaina o le semina sa saili ai ni finagalo o le atunuu lautele i le fausia o lea faiga faavae.
“O le galuega lava afai ae suesue atu ua solia ai taiala o le galuega faalesoifua maloloina e tatau lava ona uia ala o le tulafono i le ave i le faamasinoga”. O le Tulafono faasino i le auaunaga lenei o loo aiaia ai ma le tagofia o ni faaseā ma ni faitioga, peitai o le saunoaga mai le Faatonu sili aoao e lei faataotoina lava se faiga faavae e mafai ona faagaioia ai lea tulaga.
Ua iai vaega eseese o le auaunaga tau soifua maloloina ma o loo tagofia lava e latou le suesueina o faaseā peitai o le suesueina i se tulaga e faafoe ai e le matagaluega o lea ua faatoa tapena. O le tāua o le suesueina o ni faaseā na saunoa manino lava le faatonu sili e maua ai le fofo o ni faaletonu e tulai mai i le auaunaga.
O loo taoto nei i le faamasinoga le tagi a le aiga o le alii Niu Sila o Hans Dalton na maliu i le falepuipui i Tafaigata a o nofo taofia ai. O loo faasaga le tagi i leoleo ma le matagaluega o le soifua maloloina na latou faia le fautuaga e ave lea alii i Tafaigata e loka ai ona o aafiaga o le gasegase o le mafaufau.
E lei mamao atu foi ni tausaga na ave ai e se aiga se tagi i le soifua maloloina ona o le pepe a se tasi o tina talavou o lea aiga na fanau uma le ola. O loo totogi ai e le matagaluega se vaega tupe i se soalaupulega na faia i le va o itu na aafia.
O se isi foi mataupu na ave ai se tagi a se tamā o lona toalua na fanau i le falemai i Tuasivi i Savaii ma maliliu uma ai le tina ma lana pepe. Sa faia foi se soalaupulega i le va o le itu tagi ma le matagaluega o le soifua maloloina ma e iai foi le talitonuga sa totogi ai se vaega tupe i le aiga o le tina na maliu faatasi ma lana pepe.
E ese ai mai ia tagi ua oo i le faamasinoga le mau faaseā ma faitioga o loo agai i le aufaigaluega i fomai ma tausi soifua ona o tuua‘iga e faatūtū i le faatinoga o o latou tiute.
