Faatuina le lālā o le Toastmasters International i Magele i Aukilani
Ua a‘e nei se tofa i nisi o le mamalu o le tatou atunuu o le a faatuina se lala o le faalapotopotoga lenei a le lalolagi, ua ta‘ua o le Toastmasters International, i totonu o Magele i Aukilani. Talu ai ua maitauina le toatele o le mamalu o tagata Pasefika ua iai lo latou talitonuga, o se vaega lelei tele lea mo le olaga alualu i luma mo tagata Pasefika.
O alo o le tatou atunuu o loo taulamua i lenei faamoemoe, o tamaitai ia Marlene Krone, Rosetta Simanu ma tamalii ia Ami Pepe ma Stephen Bhudai. Ua molimauina e nei alo o le tatou atunuu, talu ona latou auai atu i aoaoga a le Toastmasters, ua mafai ona maua ai le ola finau, ola taumafai, siitia lagona faatulagaina e talitonu ai e mafai ona e faatuina ni sini ma ni faamoemoe ua ia te oe.
E pei ona silafia e le mamalu o le tatou atunuu, o Ami Pepe o se tamalii Samoa, na ia ulufiaina le Toastmasters i le tausaga e 2012, ma tulai mai ai o ia o se tagata Pasefika muamua ua avea ma se failauga faapitoa faavaomalo. Lona uiga, e fesoasoani tele le Toastmasters ia te oe, e aoaoina oe i le ola finafinau mo lou lumanai manuia.
O se faalapotopotoga a le lalolagi, ua toatele i latou i totonu o Niu Sila ua auai atu i ai. Ae o se taimi muamua lenei ua mafai ai ona faasino tonu lenei fuafuaga, mo le lelei alualu i luma o tatou lava tagata Pasefika. O lenei faamoemoe e soo se isi lava e fia auai, i luga atu o le 18 tausaga le matua.
Lona uiga, e mafai e le tele o aoaoga a le Toastmasters, ona siitiaina lou ola fia taumafai, pe afai e te fia auai mai i ai.
Aoaoga ua faatulaga e faamanuiaina ai se tasi i le Toastmasters
E te aoaoina auala e faaleleia ai lau talanoa pe momoli atu o ou manatu (Gain the confidence to communicate); E te aoaoina tomai ina ia avea oe ma se taitai (Leadership skills); E te aoaoina pe faapefea ona e mautinoa ma e talitonuina ou lava lagona (Self-confidence); E te aoaoina ai tomai mo au fesootaiga faalauaitele (Communication skills); E te aoaoina auala e aveese ai lou matafefe ma lou matamuli (How to get rid of fear); E te aoaoina tomai e te kilivaina ai ni aoaoga faasemina (Seminar & Facilitating skills); E te aoaoina ai tomai ina ia avea oe ma failauga i le lautele (Public speaking skills).
O le Aso Lulu, 23 o Iulai 2014, i le 7 i le afiafi, o le a tatala aloaia ai lenei faamoemoe i le Mangere Community Learning Center, 372 Massey Road, i Magele. Ma e tailua vaiaso i lona Aso Lulu i le 7 i le afiafi, ma faia aoaoga a le Toastmasters i Magele.
O se avanoa faaauro lenei mo soo se tasi ua iai sona faanaunauga e aoaoina le tele o nei tomai faamanuiaina e pei ona ta‘ua i luga. O lona uiga ua tatau nei loa ona faafesootai le tamaitai o Marlene Krone mo le lesitalaina o lou suafa.
Ua faamaonia le toatele o i latou ua faamanuiaina, i totonu o galuega ma le soifua alualu i luma, ona o aoaoga ua tuuina mai e le Toastmasters. E mafai ona faafesootai atu ia Marlene Krone i le telefoni 021 228 3206 poo le marlene.krone@xtra.co.nz.
