E lē o taitai ona mate le lamepa a le BEST; i le susulu atu pea ia sulugia uma alo ma fanau o le Pasefika, seia oo ina aliali ma folasia i lumāmea le ‘oa ma le tamaoaiga o tomai o loo natia, e ono avea ai i latou ma ta‘ita‘i iloga, i soo se tafa o lenei soifuaga.
O se tasi lena o moemitiga a le BEST, ua aloaia nei le tino mai, e pei ona iai le sauniga faapitoa i le vaiaso atu i ona tua, ina ua tatala aloaia ni polokalame se lua tau a‘oa‘oga.
O nei polokalame o loo taulai atu lava i alo ma fanau o le Pasefika, ina ia o latou maua toleniga ma a‘oa‘oga e tapu‘e ai o latou tomai o ni ta‘ita‘i, poo ni pule i falefaigaluega galuega, o pisinisi, se ta‘ita‘i i faalapotopotoga, i upufai o malo, o ekalesia, nuu ma aiga, ma soo se vaipanoa o le a tutū ai i matagiolo ma faatonutonu folau i soo se folauga latou te tauaveina i le lumanai.
O le tatala atu o faitotoa i le BEST Pasifika Leadership Academy ma le charitable Foundation, ae o le tapunia aloaia lea ma faapine ai le mālōlō o le tamaitai lauiloa o Beatrice Faumuinā, mai lana tautua ia Niu Sila e ala i le itu tau taaloga.
O Faumuinā o se alo o Samoa, ua tele tausaga o ona tauaveina le tagavai a Niu Sila i tausinioga a le lalolagi i le taaloga o le togi pulu mamafa (shotput). Peitai, o lea ua suia nei le itulagi ua agai i ai le silasila ma le faamuamua a Faumuinā, a o ia tauave lona tofiga fou ua filifilia ai e le BEST, e avea ma Faauluuluga poo le Pule Sili o polokalame ua tatalaina nei, le Pasifika Leadership Academy ma le charitable Foundation.
I se vaega o saunoaga a Faumuinā i se pepa o faamatalaga, na ia ta‘ua ai, ‘o lona faanaunauga ia tulai mai tamafanau a le Pasefika o nisi e mafai ona ta‘ita‘ia o latou lava tagata, ia latou foia o latou lava faafitauli, ma avea o nisi e silisili atu mea lelei latou te mafaia.
O le ala lea ua naunau ai e tuu atoa lona malosi ma ona tomai i lenei polokalame, ina ia ausia lena moemitiga.’
Ua saunia polokalame mo le a‘oa‘oina o tomai o ni ta‘ita‘i (leadership training programmes) mo tagata Pasefika i Niu Sila, ma o Aperila i le tausaga fou, 2011, e amata ai vasega mo le sailia o le uluai Diploma ua faia i Niu Sila, le Diploma in Pasifika Leadership.
O le fuafuaga a le aoga, o le a faasolosolo lava i luma ona faatulaga nisi diploma, ma e oo foi ina tuufaatasia a latou polokalame nei ma isi vaega (providers) i le Pasefika i Saute, ma faatulaga ai foi se polokalame mo le sailia o le faailoga Master i nei lava tomai.
O le alii pulenuu o le Super City, le susuga Len Brown na avea ma failauga autū o lea sauniga i le TelstraClear Pacific i Manukau. Sa faamamafa foi e Mayor Len Brown le tāua o le atiina a‘e ina ia malosi se leo o tagata Pasefika i totonu o Aukilani, auā o le ki lea i le manuia o le aai. O tomai na e mafai ai ona agavaa se tasi mo le ofi i totonu o Komiti fou Faufautua a le Pasefika i Aukilani.’
Soo se tasi e fia apalai i se avanoa mo le Diploma of Pasifika Leadership poo le polokalame e faafailele ma faatonutonu lelei ai mafaufau o le au aooga (mentoring programme), e mafai ona faafesootai Beatrice Faumuinā mo nisi faamatalaga, i le imeli Beatrice.Faumuina@best.ac.nz.
