O le tele lava o tagata mai isi atunuu e tausinio e saili le ‘oa ma le tamaoaiga i le soifuaga nei, e lē gata i soo se pisinisi ma soo se vaega, ae o le soifua lava ia o le Samoa e tele atu lona taimi e faaalu i le saili malo i le Atua ma lona finagalo. E moni lava e faavae Samoa i le Atua.
I le maitau atu i le tele o le paia ma le loaloa o le atunuu, e molimauina ma maitauina ai le alualu i luma o le auaunaga i le Atua. E ui ina eseese fata tapuai ma tovine peitai e tasi lava le auga e taulai i ai, o le finagalo o le Tamā o i le lagi.
E pei foi la o le Aso Toonai ua tuanai na tuufaatasia ai le fale 12 a le Faasinoti Ekalesia Metotisi a Kuiniselani ona o le usuia lea o le fonotaga a le Auuso Fealofani, e tapena atu ai mo le Koneferenisi lea o le a faia Samoa i lenei foi tausaga. Na taitaia le sauniga e le susuga ia Rev Sailiai Tumaai ma faia ai lava le faamanatuga.
Sa matuai faatumulia lea tauaofiaga i le paia ma le mamalu o le Faasinoti i falesa e 12 e aofia ai ma Cairns. Na faatinoina ai se tausala a le auuso fealofani a le sinoti, i falesa nei e 12, ma tauaaoina ai se tino i tupe e tusa ma le $15,000.00.
O lea seleni e faaagaaga mo le tapenaga a le auuso a o faasauni atu ai le faigamalaga mo Samoa i le Koneferenisi faapea le atina‘eina o le auuso a Kuiniselani.
A mae‘a loa, ona alo loa lea i le fonotaga. O le Aso Sa la, aso 15 sa taitaia ai le aoga faale-Tusi Paia e le aumalaga mai Cairns, ma na sioa foi le au Brisbane a o alo atu le itu i Matū mo le latou sao tāua.
O le malumalu tapuai o le aao tusitusi, susuga i le tausi matagaluega ia Rev Sailiai & Tavae Tuma‘ai i Redcliffe sa faataunuuina ai le sauniga i le Aso Sa ua tuanai.
O le susuga foi i le aao tusitusi o le Faasinoti o loo nafa ma pisi i nisi vaega tāua o tapenaga o le Sisigafua i Kuiniselani i le masina fou, e pei ona tapenaina ai e le Mafutaga Soofaatasi o ekalesia.