Tapē eletise e tofotofo afi fou ae mafatia ai aiga

E lei leva nei ona amata faaaogā le afi eletise fou i Fiaga ae ua amata nei ona tofotofo e le faalapotopotoga o le malosi faaeletise le EPC pe faapeī le gaioi a ia afi fou. Na pogisa atoa le motu o Upolu i le po o le Aso Lua talu ai faapea le motu o Manono ina ua titina faafuasei le eletise mo le faia o ni siaki i le tulaga o ia afi.
E pei ona masani ai, sa muai faasalalau e le EPC mo le silafia e le atunuu le motusia o le a iai le eletise mo ia galuega, ae peitai sa toatele pea le atunuu e lei silafia, ma mafua ai ona faaletonu nisi o meatotino e alu i le eletise e pei o TV, ma pusaaisa.
Na fesiligia se tasi o tamaitai ofisa o le malosiaga tau eletise le EPC, ae na ia ta‘ua e na o le tasi le leitio faasalalau i le atunuu o loo ave i ai faasalalauga mo le atunuu e faasino i le pe faafuasei o le uila, ma atonu o le mafuaaga lea o le lē silafia uma e le atunuu.
I le faasalalauga lava lea o loo faaali ai e le alii pule sili o le faalapotopotoga le afioga Tologata Lupematasila Galumemana Tile Le‘ia, ‘O nei faafitauli e masani ona tutupu i vaega amata o soo se vaega fou tau eletise poo ni masini foi, ma ua ia faailoa ai i le mamalu o le atunuu o loo alala ma papa aao i Upolu ma Manono-tai, ina ia nofo silafia i nei tulaga, ona e ono motusia faafuasei ai le eletise i lenei vaiaso ma le vaiaso o lumanai.
O le faamatalaga faalauaitele mai le EPC o loo faailoa ai le mafuaaga o le motusia faafuasei o le uila poo le eletise, e lē o faamatalaina ai le na o le tasi o se alaleo leitio o loo faasalalau ai se faasilasilaga e faatatatau ia latou galuega o loo saili ai le lelei o afi.
Faaalia e le tamaitai ofisa sinia ia tatou tala, ua lē mafai ona ave ni faasalalauga i nusipepa ma televise ona ua faaitiitia tupe alu i faasalalauga faalauaitele mai le faalapotopotoga.
O loo niniva le toatele i le atoa o le itula ma le 30 minute o pe le eletise i le po o le Aso Lua, ma e tupu tonu lea gaioiga faatoa amata taligasua o le afiafi, a o nisi aiga sa iai ni o latou faalavelave e pei o maliu sa fai, ma ua avea le pe faafuasei o le eletise, na matuā faaletonu uma ai na fuafuaga.