O le Tafatolu o pulega e aofia ai le Malo, Palemene, ma le Faamasinoga e lē feaiāa‘i. E tumaoti faaiuga a le Faamasinoga e faapena foi le Palemene e oo ile Malo le executive.
O le faamatalaina lea o le finagalo atoa o le Palemia ina ua faia lana saunoaga faaminisita na afea ai ma le lipoti o fautuaga a le Komiti o Ofisa o le Palemene na latou toe suesueina faaletonu i le lipoti a le Suetusi Sili a le Malo. O le latou fautuaga ia faia ni suesuega faasolitulafono ia i latou o loo tuua‘ia i faaletonu i le pulea o tupe ma meatotino a le Malo.
O le Komiti lea e aofia ai sui faipule o le itu a le Malo ma le Itu Agai. Na tutu faatasi sui uma o le komiti ia latou fautuaga na ave i le Malo, peitai i se taimi faaumiumi sa tatali ai ni tali a le Malo, o le vaiaso ua mavae na folasia ai le finagalo o le Malo ma ua teena ai lea fautuaga.
O le faavae lea o se finagalo o le Itu Agai ua togi atu nei i le Palemia ma le faigamalo, ina ia faatu loa se itutino poo se Corruption Tribunal e suesueina faaletonu i faiga piopio ma faiga faaalatua i totonu o le Malo.
E talitonu le Itu Agai o se auala sili lea ona tutoatasi e tagofia ni faiga faaletonu e lē gata o le pulea o tupe ma meatotino a le Malo, ae o ni pulega foi e aliali ai ni faaiuga pitotasi ma le lē amiotonu.
E lē o se taimi muamua lenei ua togi atu ai lenei fautuaga a le Tautua Samoa, peitai e lē o afea i faaiuga a le Malo o iai nei.
I le finagalo o le Palemia susuga Tuilaepa Lupesoliai Sailele Malielegaoi, i le polokalame masani tai vaiaso ma le leitio a le Malo, na ia saunoa ai ua taoto tulafono ma faiga masani ua aiaia e faatino ai ni sailiiliga i ni faaletonu, ma e lēo manaomia ai sea faiga ua fautuaina e le Tautua Samoa.
O lona finagalo e faapea o le suesuevale ma le tulituliaupu pea o ni faaletonu e aliali ai nisi uiga lē manuia, ae ua iai lava auala e faatino ai ni suesuega pe a iai ni faaletonu e aafia ai tagata faigaluega a le Malo poo taitai foi o le Malo.
O Komisi suesue o loo faapea ona tofia pe a finagalo ai le Malo tasi ia o faiga masani. O loo iai foi le Komesina o Sulufaiga o lana lea matafaioi e faatino i ni faaletonu e tulai mai.
O le tutasi o le finagalo ma faaiuga a le Palemene na toe faamanatu mai ai e le Palemia le mataupu na ave ai e lē sa avea ma Suetusi Sili faiga faavae a le Malo i le faamasinoga, e mafua i lana lipoti na tuuina atu i le Palemene.
O le iuga a le faamasinoga e pei ona saunoa le Palemia na faamaonia ai e lē aiāina e le faamasinoga faaiuga a le fono aoao faitulafono poo le Palemene.
Na mafua le finagalo lea o le Palemia ona o ni manatu o nisi o sui o le komiti a le Palemene na latou faaalia ai, a lē talia e le Malo le latou fautuaga, o le a latou tuuina atu le mataupu i le faamasinoga.
I le finagalo o le taitai o le Tautua Samoa i le mataupu lenei na ia faaalia ai, e eseese mea. E ese le faamasinoga na ave ai e lē sa avea ma Suetusi Sili faiga faavae a le Malo i le faamasinoga, ese le mataupu o loo finau atu ai, o faaletonu i le pulea o meatotino ma tupe a le atunuu ona o loo aumai le lipoti a le Suetusi Sili o iai nei, e iai faaletonu, peitai ua fautua atu le komiti ae ua teena mai e le Malo.
O le faavae lea o se finagalo o le tasi o sui o le komiti le afioga Aeau Peniamina i lona faanoanoa tele i le tulaga ua taunuu i ai le galuega a le latou komiti. Saunoa mai Aeau, e miliona tupe a le Malo sa lē amiotonu lona faaaogāina, ma o le atugaluga lea auā o le latou tiute lea o faipule o le Palemene o le faia o le faaiuga amiotonu.
