Taoto se fuafuaga e a‘oa‘o ai tusitala e suesue faiga faaalatua

Ua sauni le faalapotopotoga fou mo galuega faatusitala ma faasalalauga i le Pasefika ua faaigaoina o le PASIMA (Pasifika Media Association), e faagasolo sana polokalame faaleaoaoga e a‘oa‘oina ai tusitala e faia galuega e suesue ai faiga faaalatua, o faiga piopio ma faiga lē amiotonu e aafia ai le soifua lelei o tagata aemaise e aafia ai tamaoaiga o atunuu taitasi.

O le PASIMA o se faalapotopotoga na faavae ma faatuina i Samoa i le tausaga e 2010, ina ua lē mafai e le faalapotopotoga o tusitala o le Pasefika le PINA, ona tulai ane e tetee pulega lē amiotonu a le faigamalo faafitafita a le atunuu o Fiti lea ua aiāina ai galuega a tusitala o lea atunuu.

O Aukilani sa fono ai le komiti faafoe o le PASIMA i le vaiaso na tea nei, e faataoto ai le polokalame mo le faatinoina o le a‘oa‘oina o tusitala o le Pasefika.

O le a‘oa‘oga ua mafai ona faatupe e ala i se foai a le Malo Peretania sa taulamua ai le ofisa o le Hai-Komesina o lea malo o loo i Honiara le laumua o le atu Solomona.

E selau afe ($100,000) tala Amerika lea fesoasoani o le a faagaioia ai le a‘oa‘oga e faaaogā ai fesootaiga i luga o initaneti poo se online course.

Sa tele vaega o le polokalame na soalaupule e sui o le komiti faafoe, e taitaifono ai le Peresitene le afioga Savea Sano Malifa, le pule faatonu o le nusipepa o le Samoa Observer, e pei o le sailia o ni tagata ua iai le agavaa a‘oa‘oina e faatino ai le polokalame.

E lē faigofie le sailia o ni tusitala e mafai ona latou suesueina ni faiga faaalatua, ma faiga piopio, ma o le autū lea o loo silasila i ai le komiti ua ave i ai le galuega e tapena le a‘oa‘oga, ina ia mautinoa o tusitala o le a a‘oa‘oina ua iai le loto atoatoa e faatino ai le galuega e aunoa ma le faaituau ma le fefe.

O le tamaitai mai Hawaii o Ana Currie ua filifilia e le Komiti faafoe e na te pulea le faagaioiga atoa o le polokalame, ma le faamoemoe e oo atu i le ogatotonu o le tausaga fou ua amata ona faagasolo le a‘oa‘oina o tusitala, i soo se leitio, nusipepa ma televise i le Pasefika.

E lē na o sui auai o le PASIMA mai Tonga, le Atu Kuki, Solomona, ma Papua Niu Kini o le a agai i ai le a‘oa‘oga, ae tatala mo soo se auaunaga tau faasalalauga i le Pasefika. E talitonu le komiti faafoe o se avanoa e maua ai le autasiga o itutino uma tau faasalalauga i le Pasefika, e aunoa ma le pitotasi i se atunuu.

O le amataga o le tausaga fou o loo fuafua e toe feiloai ai le komiti e tuliloa le faataatiaga o le fuafuaga atoa. A o fono i Aukilani i Niu Sila le Komiti faafoe o le PASIMA, sa mafai ona feiloai ma le taitaifono o le PIMA le faalapotopotoga o nusipepa, leitio, ma televise a le Pasefika i Niu Sila, le faletua ia Iulia Leilua, o se tamafanau a Samoa.

Sa faaalia ai e le faletua le agaga fiafia e galulue faatasi ma le PASIMA i le atina‘eina o le tiute tauave o tusitala, i le faalauiloaina o faamatalaga mo le silafia e tagata lautele.

Sa asia foi e le Komiti faafoe le nofoaga tutotonu o galuega tau faasalalauga a le Pasefika i le Iunivesite o Aukilani, mo le saga faalauteleina pea o le galulue faatasi ina ia ausia ma maua le sini o le faaleleia o galuega a tusitala ma tiute tau i le faasalalauina o faamatalaga.