Ua taoto nei se fuafuaga a le Malo mo le fausia o se nofoaga fou e avea ma falepuipui peitai e lei faailoaina mai poo Tafaigata lava i le nofoaga o loo iai nei le falepuipui o le a fausia ai lea galuega, poo se isi nofoaga. Faaalia e le Minisita o le matagaluega o leoleo ma falepuipui le afioga Toleafoa Apulu Faafisi, ua iai se fuafuaga ua silasila nei i ai le matagaluega ma le Malo. Peitai sa ia teena nisi o finagalo faaalia o faipule e faapea o loo faaletonu taumafa ma nofoaga o loo nonofo ai pagota.
O le mau a le minisita e le tatau ona faatusatusaina falepuipui i Amerika ma isi atunuu i le falepuipui i Samoa, ma o le tagata foi e nofosala ona ua soli le tulafono e le tatau ona toe maua le soifuaga masani sa ola ai, ae a faatusatusa i le olaga i le falepuipui e faatolu ona maua le taumafa i le aso. O pagota foi i atunuu e pei o Amerika a sola e le toe o nisi o lona aiga ma lona nuu e momoli i leoleo, ae o Samoa e mautu lana pulega mamalu i nuu o loo iai matai e faatinoina, e sola loa se pagota ma vaaia i tua, e toe logo lava i leoleo ma momoli e se aiga o se pagota.
O se taimi e lei mamao na lipotia atu ai e le Samoa Times solaaga a nisi o pagota na o latou ave faamalosi se pasi ma malaga ane ai loa i le taulaga i Apia. O se taimi foi e lei mamao na lipotia atu ai nisi o faitioga i le falepuipui poo le toese i Tafaigata ma le tulaga le lelei o loo iai faapea le faaaogaina e tagata e ave iai e tuli ai faasalaga. Ma atonu o le fausia o seisi falepuipui fou o le a fesoasoani i le foia o lea faafitauli faapea foi ma le tagai i le itu tau le soifua maloloina mo pagota o le a nofoia ia nofoaga.
