“O loo faataga pipi atoatoa ae faasā lava ona aumai lona siusiu”
E toatele le atunuu o loo nunumi ma leai se malamalama i aiaiga o le ofi atu o Samoa i le Faalapotopotoga o Fefaatauaiga a le Lalolagi le WTO (World Trade Organisation) e faasino i le taumafa o le siusiu o le pipi poo le turkey tail meat lea o loo faasāina pea ona faaulufale i le atunuu.
Ua faaalia e se molimau mai le vaega a le fa’asu poo le quarantine i le matagaluega o faatoaga ma faiga faiva, e iai lava nisi o loo aumai siusiupipi mai Amerika Samoa, ona o loo manatu ua tatala le tapu.
O se faasilasilaga mai le Minisita o le Soifua Maloloina ua faaalia ai, e faato’ā toe matala le faitotoa mo le malaga mai i Samoa o siusiupipi, pe a mae’a le 12 masina talu ona aloaia le avea o Samoa ma sui o le WTO.
O le vaiaso nei na faaalia ai e se molimau faatuatuaina, le taunuu o se tasi o pasese mai Tutuila ma se faamomoli o siusiupipi, ae sa taofia ona o loo faasā ma tapu pea ona faaulufale i le atunuu ia ituaiga o aano o manufasi mo meataumafa.
“O lea o loo taga ona aumai le tino o le pipi atoa ae e tapu lava lona siusiu”.
O le masina fou o loo faatulaga e faaofi atu ai Samoa i le WTO, ma o le a amata faitau ai masina e 12 e pei ona faailoa i se faasilasilaga faalauaitele a le minisita o le soifua maloloina, ona faato’ā toe faataga lea o le siusiupipi.
E iai le talitonuga o le naunau tele o nisi e fia tausasami i le siusiupipi ona ua fai si umi o tapu le toe aumaia i le atunuu o lea taumafa, o le mafuaaga lea o le lē manino ma malamalama i faasalalauga e faatatau i le siusiupipi.
“O loo iai pea le tatou tulafono na fausia o loo sā ai lea taumafa, ma e tatau i tagata uma ona usitaia”.
O le finagalo lea o se tagata faigaluega o le quarantine ina ua fesiligia. Ua manino mai foi i le faasilasilaga a le matagaluega o le soifua maloloina, a oo ina toe tatala mai lea taumafa, e lē toe faatauina e faleoloa ma kamupani siiatoa, ae o le a aumai lava e tagata e fia tausasami ai, ona tuusa’o lava lea i o latou aiga e faaaogā ai.
O loo fesiligia e nisi o pisinisi pe aisea ua faapea ai ona faia le siusiupipi, ae o isi taumafa tau aano o manufasi o loo aumai mai fafo e pei o vae moa, tapuvae puaa, ma fasi mamoe o loo faatau e faleoloa laiti ma faleoloa tetele.
O le tulafono o aiā tatau o tagata faatau o loo aiaia ai, o le saolotoga o le tagata e filifili ai i le ituaiga o taumafa e fia tausami ai, ma o le filifiliga foi lea e faia i luga o le silafia e le tagata faatau o fautuaga ma timaiga faalesoifua maloloina i taumafa e tele ai le ga’o, ma e lē tatau ona ia faaaogā ona o puipuiga mai faamai lē pipisi e pei o le suka, toto maualuga, ma le tino ua soona puta, faapea gasegase o le fatu, gasegase o fatu ga’o ma le kanesa.
