Taofia le alii faipisinisi ma lona toalua i fualaau faasāina

E toatasi lava le tagata o loo taofia pea e oo mai i le taimi nei talu mai ona maua se vaega o le pauta o le ‘aisa i se pusaoloa mai Amerika i le tusa nei ma le vaiaso, ma ua lipotia o lea tagata o se tasi e faia ni ana pisinisi faleoloa ma lona toalua i ni nofoaga eseese i le taulaga, o ia lea o Scott Barlow.
Ua faailoa e leoleo o le alii o Scott Barlow ma lona toalua, sa taofia uma i le falepuipui ae o lea ua toe tatala i tua le tina e faatali ai le aso e tutulai ai i le faamasinoga, ae taofia pea le tamaloa mo suesuega. E lē o faailoaina e leoleo pe fia le mamafa o le pauta na maua ae poo le ā foi le ituaiga poo se aisa e pei ona lipotia ai poo se cocaine.
O le aso 23 o le masina nei na maua ai lea pauta faasāina ma e tusa o lipoti lata mai mai ni molimau i le ofisa o leoleo, sa faia ni suesuega faafuasei poo ni raids a leoleo ina ua maua ia pauta i le fale o lē ua taofia ma molia, faapea nofoaga o loo iai ana pisinisi. O se tasi o suesuega na maua ai ni paipa ma isi totoga e fesootai atu i le faaaogāina o le aisa.
Faaalia foi e ia molimau e iai ma nisi tagata o loo faalilolilo ona faia i ai sailiiliga ona o ia tagata o loo masalomia e iai o latou sootaga i le aumai faasolitulafono o le aisa, peitai e leai iai se isi tagata e ese mai le alii o Scott Barlow ua taofia pe molia i le taimi nei. O le vaiaso a sau e tutulai ai lē ua taofia ma lona toalua i le Faamasinoga Maualuga mo le taimi muamua.
I tala lava o pauta ma laau faasāina o ananafi na lipotia mai ai i Amerika Samoa, e faapea e lua ni afifi o ni meli na lafo atu i le falemeli na maua ai ni pauta faasāina o le aisa. E toatolu tagata ua taofia ai, ma o ia tagata e mai se aiga e tasi na o atu uma lava e ave i tua le afifi sa lafo atu ai le pauta faasāina. O Samoa i Sasa‘e e fai si maualuga o gaioiga faasolitulafono e fesootai ma pauta ma laau faasāina.